Os comedores dos centros de formación e experimentación agroforestal da Xunta acadan a distinción de “Km 0 de Galicia” ao usar produtos de cercanía nos seus menús

A Axencia Galega da Calidade Alimentaria, dependente da Consellería do Medio Rural, estivo traballando nos últimos meses para que os comedores dos seus catro centros de formación e experimentación agroforestal obtivesen a distinción de “Km O de Galicia”, outorgada pola empresa Slow Food Compostela.

Concretamente, os comedores dos centros de Lourizán, Sergude, Becerreá e do Pedro Murias contarán este novo curso con esta distinción, que acredita que se empregan alimentos de tempada e de proximidade nos seus menús, destacando o uso de produtos amparados polos distintos selos de calidade diferenciada. Desta forma, preto do 60% dos alimentos empregados na confección dos menús provirán de canles curtas de comercialización, ao ser de produtores da propia comarca.

Así, a Consellería do Medio Rural aposta pola valorización da produción alimentaria galega e por implementar a súa filosofía de desenvolvemento sostible. Ademais, tamén se busca acadar un impacto no territorio económico, social, ambiental e educativo, pero sen perder de vista a propia viabilidade económica desta iniciativa.

Para acadar esta distinción, levouse a cabo co persoal dos comedores unha formación específica sobre a xestión de residuos, a eficiencia enerxética e o abastecemento, facendo fincapé na correcta identificación dos alimentos certificados, ben sexan de pesca sostible, de razas autóctonas ou alimentos con certificados de calidade. Seguidamente, buscáronse provedores da contorna que puidesen facilitar produtos adecuados ás necesidades de cada un dos comedores e garantir o abastecemento dos alimentos durante toda a tempada.