O director da Axencia Galega de Infraestruturas, Francisco Menéndez, interveu hoxe na Comisión 2ª do Parlamento
A Xunta avanza no estudo para a mellora da estrada OU-533 en Valdeorras, que financiará con fondos propios ante o rexeitamento do goberno de investir na mobilidade do rural
Francisco Menéndez lamenta a falta de resposta do Goberno ante as solicitudes da Xunta para financiar con Fondos Next Generation o acondicionamento desta vía que conecta a comarca de Valdeorras coa estación ferroviaria da Gudiña
Ante este rexeitamento, concreta que a Xunta está a identificar as actuacións a realizar na estrada para proceder posteriormente á redacción do proxecto
Indica que se están a valorar actuacións como a Variante da N-525 e da OU-533 na Gudiña, unha Variante en Viana do Bolo ou acondicionamento da OU-533 nos treitos A Gudiña- Viana do Bolo e Viana do Bolo- A Rúa, entre outras obras
Avanzou o comezo do reforzo de firme na OU-533, ao paso polos concellos da Gudiña, Viana do Bolo e O Bolo, cun investimento de máis de 1,2M€
A Xunta avanza no estudo para a redacción do proxecto de mellora da estrada OU-533 na comarca de Valdeorras, que financiará con fondos propios da Comunidade Autónoma ante o rexeitamento do Goberno de investir na mobilidade do rural.
O director da Axencia Galega de Infraestruturas, Francisco Menéndez, interveu hoxe na Comisión 2ª do Parlamento, onde detallou que se están a identificar as actuacións a realizar para proceder á redacción do proxecto.
Lamentou a falta de resposta do Goberno ante as solicitudes reiteradas da Xunta para o financiamento, a través dos Fondos Next Generation, do acondicionamento da estrada OU-533, que une a comarca de Valdeorras coa estación ferroviaria ‘Porta de Galicia’ da Gudiña.
Criticou a perda desta oportunidade para contribuír a reforzar as comunicacións no rural, en consonancia co criterio do Goberno de concentrar o desenvolvemento de infraestruturas ao servizo de áreas máis poboadas.
Fronte a este rexeitamento de colaboración por parte do Executivo central, o Goberno galego está a traballar na definición de varias actuacións para mellorar a funcionalidade da citada estrada.
O director detallou que se están a valorar obras como a Variante da N-525 e da OU-533 na Gudiña, e a mellora dos enlaces da A-52. Sinalou que hai un problema de estrangulamento, por ancho, gálibo e paso por treito urbano, na Gudiña, que debería solucionar a Administración do Estado, pero que está a estudar a Xunta para ofrecer unha alternativa.
Tamén citou o acondicionamento da OU-533 entre A Gudiña e Viana do Bolo, o treito que precisa dunha actuación de maior calado, tanto para aumentar a lonxitude de terceiros carrís de adiantamento como para rectificar o trazado e suavizar as curvas.
Apuntou a unha Variante de Viana do Bolo, pois o paso por este núcleo é complicado para o tráfico rodado normal e máis para os transportes especiais.
Ademais concretou a necesidade do acondicionamento da OU-533 entre Viana do Bolo e A Rúa, coa rectificación de curvas e terceiros carrís.
Mellora do firme na OU-533
Por outra parte, Francisco Menéndez avanzou o comezo dos traballos de reforzo de firme na estrada OU-533, entre os puntos quilométricos 0,8 e 33, nos concellos da Gudiña, Viana do Bolo e O Bolo, que suporán un investimento de máis de 1,2 millóns de euros.
Estas actuacións complétanse co repintado completo da estrada OU-533, ademais doutras obras como a limpeza e o reperfilado de marxes ou a execución de cunetas de seguridade.
Lembrou que a Xunta xa executou nos últimos anos obras de mellora do firme en diferentes tramos desta estrada, sumando un orzamento de preto de 1 millón de euros.