Diego calvo reivindica o sector forestal galego como “fonte de creación de riqueza e emprego”

O vicepresidente segundo e conselleiro de Presidencia, Xustiza e Deportes, Diego Calvo, participou hoxe na xornada organizada pola Asociación de Silvicultores Costa Norte baixo o título Produtos derivados da celulosa, onde reivindicou o sector forestal galego como “fonte de creación de riqueza e emprego”.

Na súa intervención, o vicepresidente segundo incidiu na aposta da Xunta pola xestión sustentable e o aproveitamento do monte, con iniciativas como a Axenda de impulso da industria forestal. “Con ela buscamos potenciar a modernización e a competitividade a través dos eixes da formación, da innovación, da cooperación e valorización, e da competitividade o desenvolvemento e a diversificación do sector”, engadiu.

Calvo sinalou tamén á estratexia pioneira de Dixitalización e Descarbonización, que contribúe a acelerar os procesos produtivos, incidir na simplificación administrativa, afondar no consumo dun material renovable cunha pegada de carbono negativa, e acadar políticas de quilómetro cero.

Para o vicepresidente segundo, a aposta da Xunta polo eido forestal demóstrase a maiores na inclusión dunha iniciativa que permitiría aproveitar o liderado galego no sector entre os grandes proxectos presentados aos fondos Next Generation. Trátase da que sería a primeira planta de fibras téxtiles de España, da man da empresa Altri. Nesta liña, manifestou a preocupación do Goberno galego pola falta de resposta do Goberno central a uns proxectos fundamentais para a recuperación económica.

Relevancia estratéxica para Galicia

Por outra banda, Diego Calvo referiuse aos datos que avalan a relevancia estratéxica do monte para a economía e o emprego de Galicia, como que preto do 70% do territorio ten a consideración de forestal e que un 50% da madeira que se corta en España procede de montes galegos. Apuntou tamén que ata 80.000 familias viven de xeito directo ou indirecto do monte e que preto do 12% dos empregos industriais están vinculados ao sector, que representa case o 2% do Produto Interior Bruto.

Ante esta realidade, o vicepresidente segundo insistiu en que desde a Xunta se segue traballando co obxectivo de “garantir as oportunidades que representa o eido forestal para o futuro de Galicia”, con ferramentas como o Inventario forestal continuo ou a Lei de recuperación da terra agraria, entre outras.