A Xunta inicia as obras de reforzo do firme na estrada AC-550, entre Noia e Ribeira, que suporán un investimento de máis de 2,6 M€
Actuarase no treito que une estas dúas localidades pasando por Porto do Son, entre os puntos quilométricos 69+500 e 107+850
A intervención, cun prazo de 6 meses, dotará de maior seguridade e comodidade os desprazamentos dos usuarios que circulan por esta vía
A Xunta continúa traballando na mellora da rede viaria autonómica para proporcionarlles aos cidadáns unhas estradas cómodas e seguras
A Consellería de Infraestruturas e Mobilidade comezou hoxe as obras de reforzo do firme na estrada AC-550, entre Noia e Ribeira, que suporán un investimento de máis de 2,6 millóns de euros.
Trátase do reforzo do firme no treito que une Noia e Ribeira pasando por Porto do Son, entre os puntos quilométricos 69+500 e 107+850, onde tamén se proxecta a execución dun cambio de sentido e dun carril central de espera.
Os traballos, cun prazo de 6 meses, suporán unha maior seguridade e comodidade aos usuarios que circulan por esta vía, moi frecuentada, especialmente en temporada de verán.
Estas obras, ademais, facilitarán a mobilidade dos habitantes dos tres municipios onde se realizarán as actuacións.
A intervención está encamiñada á reparación, rehabilitación e reforzo superficial do firme, adecuándoa ás súas necesidades funcionais e de durabilidade.
O contrato tamén recolle a execución dun cambio de sentido no punto quilométrico 88+500, así como a formación dun carril central de espera para o xiro á esquerda no quilómetro 92+500, para o que será necesario ensanchar a estrada AC-550 cara á súa marxe esquerda.
Tamén se executarán pequenas melloras de drenaxe, limpeza de gabias, sinalización, balizamento e defensas.
Estas obras están incluídas no Plan de Reforzos de firme que está a desenvolver o Goberno galego co fin de manter as estradas autonómicas en boas condicións e garantir desprazamentos máis cómodos e seguros aos usuarios.
Imaxes relacionadas
