Policía Autonómica e axentes ambientais de Medio Rural esclarecen un incendio forestal no concello pontevedrés de Meis
O lume produciuse por unha imprudencia ao realizar traballos de corte cunha máquina amoladora
No que vai de ano, a Policía Autonómica leva investigadas 44 persoas como presuntas autoras de incendios forestais
Axentes do Grupo de Investigación de Incendios da Policía Autonómica en Pontevedra, en colaboración con Axentes Ambientais da Consellería do Medio Rural, veñen de esclarecer o incendio forestal rexistrado o 3 de agosto no concello pontevedrés de Meis. O lume produciuse na parroquia de San Martiño e afectou 1,4 hectáreas de superficie arborada.
Despois de realizar unha inspección na zona, acoutouse a área de inicio do incendio e descubriuse que fora provocado polas chispas dunha máquina amoladora ao realizar traballos de corte nunhas varas de ferro. Como resultado, foron investigadas dúas persoas como presuntas autoras do lume.
Nos labores de extinción participaron dous axentes, tres motobombas, dous helicópteros e seis brigadas. A Policía Autonómica remitiu as dilixencias polos feitos ao Xulgado de Garda de Cambados.
No que vai de ano, a Policía Autonómica leva investigadas 44 persoas como presuntas autoras de incendios forestais.
A Xunta continúa apelando á concienciación e á prudencia nos accesos e traballos en terreos agrarios de cara a evitar incendios. Así mesmo, o Goberno galego lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085.