O programa ‘Coidados Porta a Porta’ da Xunta atendeu a máis de 15.000 usuarios cos seus servizos gratuítos de estimulación da memoria, podoloxía e audioloxía
As oito unidades móbiles deste programa percorren dende marzo todos os concellos da nosa comunidade, agás as sete grandes cidades, para levar estes servizos a todos os galegos maiores de 55 anos, que precisarán obter cita previa
A Xunta de Galicia supera a cifra de 15.000 persoas atendidas a través do programa Coidados porta a porta. Esta iniciativa comezou o pasado mes de marzo o seu percorrido por toda Galicia ofrecendo servizos gratuítos de estimulación da memoria, podoloxía e audioloxía.
O programa conta con oito unidades móbiles que percorren os 313 municipios de Galicia, agás as sete cidades. Polo momento, leva visitado arredor de 200 concellos nos que permaneceu durante varios días. O programa está destinado a persoas maiores de 55 anos e persegue achegar estes servizos a todos os lugares da nosa comunidade, evitándolles desprazamentos para acceder a estas prestacións de saúde especializadas.
En concreto, estes 15.000 usuarios atendidos repártense en máis de 4000 na provincia da Coruña, preto de 4000 en Lugo, preto de 3500 en Ourense e máis de 4000 en Pontevedra. A iniciativa contou cunha proba piloto en 2019 moi ben acollida por concellos e atendidos, de aí que este ano se recuperase e ampliase a todos os municipios galegos.
Cita previa
Para ser atendido en calquera dos autobuses do programa, que continuarán percorrendo todo Galicia, é necesario solicitar cita previa nos teléfonos 622 748 283 ou 623 546 992, ou no correo electrónico coidadosportaaporta.politicasocial@xunta.gal.
Este luns os autobuses do programa estarán en Muxía, Dumbría, Carballedo, O Saviñao, Lalín, Forcarei, Riós e Castrelo do Val.
Imaxes relacionadas
