A Xunta inicia as obras de mellora de firme na estrada LU-133 ao seu paso polo Concello de Abadín, que suporán un investimento de máis de 2,2 M€
Os traballos, que contan cun prazo de execución de 6 meses, céntranse na rehabilitación e acondicionamento do firme ao longo de 7,8 km, comezando á altura do enlace coa estrada LU-121 e rematando na conexión coa autovía do Cantábrico
Acometeranse actuacións que redundarán na mellora das condicións da vía, complementadas con outras intervencións que incrementen a capacidade estrutural do firme, co fin de adaptalo ao tráfico que soporta e acadar unha vida útil axeitada
Mellorarase a seguridade coa execución de cunetas, sinalización horizontal, tacos de resalto e captafaros, para mellorar as actuais prestacións da estrada
O departamento que dirixe Ethel Vázquez segue traballando na mellora e conservación da rede viaria autonómica co fin de proporcionarlles aos cidadáns unhas estradas seguras e eficientes
Santiago de Compostela, 11 de agosto de 2022 A Consellería de Infraestruturas e Mobilidade comezou as obras de mellora de firme na estada autonómica LU-133, ao seu paso polo concello de Abadín, que suporán un investimento da Xunta de máis de 2,2 M€.
Os traballos, que contan cun prazo de execución de 6 meses, céntranse no acondicionamento e rehabilitación de firme ao longo dos últimos 7,8 km do treito da LU-113, de Moncelos a Abadín, o que redundará na mellora das condicións da vía e reforzarán a seguridade viaria.
As actuacións en execución realízanse no tramo da estrada comprendido entre o punto quilométrico 22+800, á altura do enlace coa estrada LU-121, ata o remate da estrada no quilómetro 30+600, na conexión coa autovía do Cantábrico.
Repararanse as zonas do firme que presenten fisuras e os treitos máis deteriorados en zonas puntuais ou con esgotamento estrutural do firme, complementadas con outras intervencións que incrementen a súa capacidade estrutural, co fin de adaptalo ao tráfico que soporta e permitindo acadar unha vida útil axeitada.
Os traballos incluirán un reforzo do firme segundo as necesidades deste tramo da estrada LU-113, superficial ou máis profundo de saneo, dependendo do deterioro, así como o estendido dunha nova capa de rodaxe.
Realizaranse fresados localizados cun espesor de 10 cm e a reposición realizarase de mestura bituminosa co mesmo espesor de 10 cm.
Tamén se executarán saneos localizados nas zonas deformadas e con esgotamento estrutural repoñendo o solo de cemento actual de base con material procedente do fresado.
Ademais, actuarase no recrecido do firme a calzada completa, en todo o ancho da plataforma.
Para a mellora da drenaxe da estrada, executarase unha cuneta de seguridade revestida en formigón, que disporá de tubo “dren” para evitar as filtracións á explanada.
Proxéctanse, ademais, un conxunto de intervencións de mellora da seguridade vía: cunetas, sinalización horizontal, tacos de resalto, captafaros, que teñen por obxecto mellorar as actuais prestacións da estrada en beneficio dos usuarios.
O departamento que dirixe Ethel Vázquez continúa traballando na mellora e conservación da rede viaria autonómica para proporcionarlles aos cidadáns unhas estradas seguras e eficientes.