A Xunta publica no DOG o cambio de titularidade a prol do Concello de Monforte de Lemos dun terreo anexo á estrada LU-664 nas proximidades do hospital

A Xunta publica hoxe no Diario Oficial de Galicia (DOG) a aprobación do cambio de titularidade a prol do Concello de Monforte de Lemos da superficie de dominio público viario, agás calzadas, beiravías e berma, na marxe esquerda da estrada LU-664; un terreo anexo á estrada que se sitúa nas proximidades do Hospital de Monforte.

A superficie obxecto da transferencia, delimitada polo servizo provincial de Axencia Galega de Infraestruturas en Lugo, esténdese ao longo dun treito de estrada de lonxitude de 260 metros, entre os puntos quilométricos 0+890 e 1+150.

Ao excluírse a calzada, a beiravía e a berma do cambio de titularidade, garántese a continuidade da Rede Autonómica de Estradas, polo que esta superficie reúne as condicións necesarias para poder ser transferida ao Concello de Monforte de Lemos.

A Xunta permite, así, que o Concello poida actuar nesta superficie, que ten unha lonxitude de 260 metros, para a execución do “Parque do hospital”. A Administración autonómica, a través da Axencia Galega de Infraestruturas, facilitou en todo momento a actuación municipal, por entender que é positiva para o hospital, e agarda a mesma actitude por parte do Concello.

A transferencia da titularidade tramítase de acordo co previsto na Lei 8/2013, do 28 de xuño, de estradas de Galicia, que establece a súa aprobación por decreto da Xunta, a proposta da Consellería competente en materia de estradas, e logo do acordo entre as administracións implicadas.

No seguinte enlace ao DOG pode ampliarse a información relativa a esta transferencia, aprobada na reunión do Consello da Xunta o pasado 27 de xullo: https://bit.ly/3BPn3XZ

O decreto ten efectos desde o día seguinte ao da súa publicación no Diario Oficial de Galicia. Polo tanto, desde mañá, o Concello de Monforte terá a competencia para actuar neste treito e asume a responsabilidade da súa conservación e mantemento