A Xunta comeza as obras de mellora do sistema de saneamento de Celeiro, no concello de Viveiro, que suporán un investimento de máis de 3,8 M€
Unha vez instaladas as casetas, agora estase a facer acopio da tubaxe para a nova condución de vertido, así como dos lastres, que se están a fabricar in situ
Construirase un novo bombeo e un depósito de retención, que levarán directamente as augas residuais de Celeiro cara ao novo pretratamento da depuradora de Viveiro
Mellorarase a condución de vertido submarino da depuradora municipal, que está a ser ampliada tamén pola Xunta para asumir o incremento de demanda procedente deste núcleo
O Goberno galego destina a ambas as dúas actuacións un investimento de preto de 8 M€ para completar o saneamento da ría de Viveiro
Santiago de Compostela, 4 de agosto de 2022
A Consellería de Infraestruturas e Mobilidade, a través de Augas de Galicia, vén de comezar as obras de mellora do sistema de saneamento de Celeiro, en Viveiro, que suporán un investimento autonómico de máis de 3,8 M€.
Unha vez realizados os traballos previos de instalación de casetas, agora estase a avanzar no acopio da tubaxe para a nova condución de vertido, así como dos lastres, que se están a fabricar in situ.
A intervención prevé a construción dun novo bombeo e un depósito de retención, que levarán directamente as augas residuais de Celeiro cara ao novo pretratamento da depuradora de Viveiro.
Os traballos, cun prazo de 12 meses, inclúen, ademais, a mellora da condución de vertido submarino da depuradora municipal, ampliada para asumir o incremento de demanda procedente deste núcleo.
A execución comezará, primeiro, por ir soldando en terra tramos de tubaxe duns 250 metros que despois se remolcarán ata a zona de fondeo para colocalos na posición proxectada. Despois afundirase a tubaxe e unirase tramo a tramo no fondo mariño.
Máis en detalle, executarase un bombeo cun tanque de tormentas de 650 m3 de volume útil que substituirá o actual bombeo de pretratamento de Celeiro, e desde o que se impulsará a auga ata o novo pretratamento de Viveiro. Permitirá a laminación, tanto nas puntas durante o día, como nos caudais en tempo de choiva.
Así mesmo, construirase unha nova condución de sumidoiro submarino que se conectará ao actual tramo terrestre e que funcionará por gravidade a través dunha cámara de carga situada a continuación da desinfección da depuradora.
Esta nova intervención de saneamento de Celeiro súmase ás obras de ampliación da depuradora municipal, que está a ser ampliada pola Xunta para asumir o incremento de demanda procedente deste núcleo.
Deste xeito, ambas actuacións completarán o saneamento da ría de Viveiro, que supoñen un investimento conxunto da Xunta de preto de 8 millóns de euros.
Estas actuacións son cofinanciadas pola Unión Europea no marco do programa operativo FEDER Galicia 2014-2020.
Imaxes relacionadas
