A Xunta declara como medida preventiva a situación 2 nun incendio forestal activo na Cañiza, parroquia de Oroso
A situación operativa neste incendio decrétase pola proximidade do lume ao polígono industrial deste municipio
Santiago de Compostela, 31 de xullo de 2022 A Consellería do Medio Rural vén de declarar como medida preventiva a Situación 2 nun incendio forestal activo arestora no concello pontevedrés da Cañiza, parroquia de Oroso. Esta situación operativa de emerxencia declárase pola proximidade do lume ao polígono industrial deste municipio.
Este incendio iniciouse á 01,00 h. desta madrugada e permanece activo arestora. Ata o momento mobilizáronse para controlalo 1 técnico, 2 axentes, 4 brigadas, 2 motobombas e 2 pas.
A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais poderá ser consultada na conta aberta de twitter: @incendios085.