Luis López clausura o obradoiro de emprego ´O Freixo´ no que se formaron 20 persoas desempregadas de Dozón, Rodeiro e Agolada

Dozón, 28 de xullo de 2022

A Xunta de Galicia, a través da Consellería de Promoción do Emprego e Igualdade, vén de mellorar as opcións de empregabilidade, a través da formación laboral, dunha vintena de persoas desempregadas dos municipios de Dozón, Rodeiro e Agolada co Obradoiro de Emprego de formato dual O Freixo, que contou cun investimento de 347.000 euros do executivo autonómico.

O delegado territorial da Xunta en Pontevedra, Luis López, acompañado dos alcaldes de Dozón, Adolfo Campos, de Rodeiro, Rubén Quintá, e de Agolada, Luis Calvo, presidiu esta mañá, no Parque de O Castro, o acto de clausura desta iniciativa laboral, no que se entregaron os correspondentes diplomas acreditativos.

“O emprego é un dos grandes eixos da acción de goberno da Xunta e por iso seguimos apostando por este modelo formativo, que ten moi boa acollida entre os concellos e as persoas sen traballo, que mellora moito a empregabilidade e favorece a inserción laboral dos participantes na bisbarra do Deza”, explicou o representante autonómico, que lembrou que na provincia de Pontevedra formouse a máis de 400 persoas nos últimos nove meses a través de vinte obradoiros de emprego que supuxeron un investimento de 6,6 millóns de euros.

Luis López trasladoulles os parabéns aos participantes, agradeceulles “a súa implicación dende o pasado mes de outubro e as gañas de aprender un oficio para mellorar os seus coñecementos laborais e outorgarse, de aquí en adiante, máis oportunidades no mercado” e amosouse convencido de que “aproveitaron axeitadamente todo este tempo para acadar oportunidades en dous sectores con moita saída laboral”. Así mesmo, tamén felicitou aos tres Concellos “por presentar un proxecto tan acaído, tan ben deseñado dende o punto de vista técnico e que ademais responde perfectamente ás necesidades sociolaborais da zona”.

Nesta liña, recalcou o “compromiso” da Xunta coa creación de emprego e a xeración de riqueza na comarca do Deza, “algo que demostramos ano tras ano con feitos, tal e como se confirma coa constante concesión de obradoiros e doutras iniciativas, como os cursos AFD de formación para desempregados que desenvolvemos nesta zona dende o pasado outono”.

O obradoiro de emprego O Freixo celebrou os módulos de Forestal e Carpintería, dando deste xeito continuidade á formación nestes mesmos ámbitos e incluíu prácticas para acondicionar camiños rurais, prazas publicas e os viais e zonas verdes do Polígono Industrial de Dozón, acondicionamento de zonas verdes e vías publicas en Rodeiro e conservación e mantemento de áreas recreativas, parques e zonas verdes no Concello de Agolada.

“Damos cumprida resposta ao que pide a cidadanía e ofertamos un programa de formación moderno, dual, orientado á xente sen traballo para mellorar a súa empregabilidade, posibilidades de futuro e inserción laboral, que ademais recibiron unha remuneración durante nove meses e que contribuíron ao beneficio colectivo de todas e todos con obras públicas e sociais a través das prácticas deste plan formativo”, concluíu o delegado territorial.