Decretada como medida preventiva a situación 2 no incendio forestal activo en Oímbra, parroquia de Rabal
A situación operativa de emerxencia que se decreta neste incendio responde á proximidade do lume ao núcleo de Feces de Cima, no concello de Verín
Cabe engadir que están declaradas tamén Situacións 2 en tres incendios en Folgoso do Courel, na Pobra do Brollón e en Carballeda de Valdeorras
Santiago de Compostela, 19 de xullo de 2022 A Consellería do Medio Rural vén de decretar como medida preventiva a Situación 2 no incendio forestal activo arestora no concello ourensán de Oímbra, parroquia de Rabal, pola proximidade do lume ao núcleo de Feces de Cima, no concello de Verín.
Este incendio entrou de Portugal ás 15,23 h. do luns e permanece activo arestora. Para o seu control mobilizáronse ata o momento 2 técnicos, 7 axentes, 19 brigadas, 16 motobombas, 5 avións e 2 helicópteros.
Cabe engadir que permanece decretada a Situación 2 como medida preventiva no incendio do concello ourensán de Carballeda de Valdeorras, parroquia de Riodolas, que se iniciou o xoves pasado e se reactivou por mor dun cambio de vento. A medida solicitouse pola proximidade do lume ao núcleo de Candeda.
Mentres, no concello de Folgoso do Courel, seguen decretadas as Situacións 2 como medida preventiva nos dous lumes rexistrados na parroquia de Vilamor e na parroquia de Seceda.
Por último, tamén segue decretada tamén como medida preventiva a Situación 2 no incendio forestal do concello lugués da Pobra do Brollón, parroquia de Saa, que permanece activo desde o xoves pasado.
A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais poderá ser consultada na conta aberta de twitter: @incendios085.