A Xunta reforzará a formación dos empregados públicos sobre xestión de fondos europeos e protección de datos persoais
A Escola Galega de Administración Pública informou ao seu Consello Reitor da convocatoria durante o primeiro semestre de 756 actividades formativas e 39.600 prazas, dirixidas principalmente ao persoal das administracións galegas
No segundo semestre do ano, a EGAP convocará actividades específicas sobre emprego público e o marco galego de competencias dixitais e contratación, entre outras
Santiago de Compostela, 19 de xullo de 2022 A Xunta de Galicia ten previsto incrementar durante o próximo semestre as actividades formativas para persoal empregado público sobre xestión de fondos europeos e protección de datos persoais.
O conselleiro de Facenda e Administración Pública, Miguel Corgos, presidiu esta mañá a reunión do Consello Reitor da Escola Galega de Administración Pública (EGAP), na que se anunciou a próxima convocatoria dunha xornada e dun webinario sobre o Plan de Recuperación, Transformación e Resiliencia, do Curso superior de protección de datos persoais e da xornada Os retos xurídicos da protección de datos no ámbito sanitario.
Durante a reunión, na que tamén participou a directora da Escola, Sonia Rodríguez-Campos, fíxose balance do primeiro semestre do ano, período no que se convocaron 756 actividades e 39.600 prazas, dirixidas principalmente ao persoal das administracións galegas. Neste sentido, destacouse o incremento dos cursos de formación continua respecto da previsión inicial, grazas a unha convocatoria extraordinaria con 1.700 prazas, impulsada debido ao elevado número de solicitudes rexistrado nos cursos.
Por outra banda, avanzáronse as actividades previstas ata o final do ano, entre as que destacan novos webinarios nos ciclos de conferencias Presente e futuro do emprego público na Administración post Covid e Novidades lexislativas no ámbito económico, e, dentro do Universo EGAP Innova, a creación dun novo e-martes sobre o marco galego de competencias dixitais e de comunidades de prácticas en materia de persoal e contratación pública.
Finalmente, tamén se anunciaron as actividades do segundo semestre do Instituto de Economía Pública de Galicia (IEP). Así, a partir de setembro impartiranse o curso superior Xestión estratéxica da economía pública de Galicia, o curso superior Auditoría no sector público, o Obradoiro avanzado sobre contratación pública de innovación, o webinario O papel da Administración no actual contexto socioeconómico e a xornada Política económica no marco das novas crises.
Imaxes relacionadas
