A Xunta adxudica por máis de 2,3 M€ as obras de reforzo do firme na estrada autonómica AC-550, no treito que une Noia con Ribeira
Actuarase no treito que une estas dúas localidades pasando por Porto do Son, entre os puntos quilométricos 69+500 e 107+850
A intervención dotará de maior seguridade e comodidade os desprazamentos dos usuarios que circulan por esta vía, especialmente frecuentada no verán
As obras teñen un prazo de execución de 6 meses e prevese que comecen a finais de agosto
O departamento que dirixe Ethel Vázquez continúa traballando na mellora da rede viaria autonómica para proporcionarlles aos cidadáns unhas estradas cómodas e seguras
A Consellería de Infraestruturas e Mobilidade adxudicou por máis de 2,3 M€ as obras de reforzo do firme na estrada autonómica AC-550.
Trátase do reforzo do firme no treito que une Noia e Ribeira pasando por Porto do Son, entre os puntos quilométricos 69+500 e 107+850, onde tamén se proxecta a execución dun cambio de sentido e dun carril central de espera.
Os traballos, adxudicados á empresa Construcciones Ponciano Nieto, S.L., suporán unha maior seguridade e comodidade aos usuarios que circulan por esta vía, moi frecuentada, especialmente en temporada de verán. Estas obras, ademais, facilitarán a mobilidade dos habitantes dos tres municipios onde se realizarán as actuacións.
Os traballos teñen un prazo de execución de 6 meses e prevese que comecen a finais de agosto.
A intervención está encamiñada á reparación, rehabilitación e reforzo superficial do firme, adecuándoa ás súas necesidades funcionais e de durabilidade.
O contrato tamén recolle a execución dun cambio de sentido no punto quilométrico 88+500, así como a formación dun carril central de espera para o xiro á esquerda no quilómetro 92+500, para o que será necesario ensanchar a estrada AC-550 cara á súa marxe esquerda.
Tamén se executarán pequenas melloras de drenaxe, limpeza de gabias, sinalización, balizamento e defensas.
Estas obras están incluídas no Plan de Reforzos de firme que está a desenvolver o Goberno galego co fin de manter as estradas autonómicas en boas condicións e garantir desprazamentos máis cómodos e seguros aos usuarios.