A Xunta organiza en Moeche un curso para o uso das instalacións do seu centro de transformación de produtos agrarios
A acción formativa, de 60 horas de duración total, terá lugar do 18 de xullo ao 11 de agosto no propio Centro de transformación
Santiago de Compostela, 13 de xullo de 2022
A Área de servizos agrarios de Betanzos-Ferrol, dependente da Consellería do Medio Rural, ten previsto celebrar unha acción de formación profesional e adquisición de competencias para o uso das instalacións do Centro de transformación de produtos agrarios de Moeche, que abrirá este mesmo ano 2022. O obradoiro darase entre os días 18 de xullo e 11 de agosto nas instalacións do propio Centro de transformación, no recinto feiral municipal, en horario de mañá ou de tarde dependendo das datas, e terá unha duración total de 60 horas.
O programa deste curso trata unha serie de aspectos sobre o funcionamento destas novas instalacións. O obradoiro terá sete grandes bloques de contido, que tratarán aspectos normativos, hixiénicos e sanitarios, xunto a nocións básicas no manexo das instalacións e o seu equipamento. Así mesmo, ensinaranse os procesos de produción, transformación e comercialización de produtos agrarios nas explotacións da zona para que os seus titulares logren un valor engadido aos seus produtos mediante novas canles comerciais.
A Axencia Galega da Calidade Alimentaria, a través da formación non regrada e dentro do Plan de formación continua 2022, pretende neste caso aportar un apoio formativo ao persoal que vaia a empregar as instalacións deste novo Centro de transformación. O centro estará supervisado por persoal propio; porén, serán os propios titulares das explotacións os que se encarguen dos traballos levados a cabo nel.
Cómpre lembrar que a Consellería do Medio Rural conta cun plan de accións formativas e de transferencia para este ano 2022 que pode consultarse no seguinte enlace: https://ovmediorural.xunta.gal/gl/consultas-publicas/accions-formativas. Precisamente nesta páxina pode atoparse o referido curso e facer a pre-inscrición en liña cubrindo os datos necesarios. O coordinador poñerase en contacto coas persoas interesadas a través do correo electrónico comunicándolle se está ou non admitido. Para consultar calquera dúbida, pode chamarse ao teléfono 981 33 70 48-49, ou enviarse un correo a area.seca.ferrol@xunta.gal.