O Xacobús da Xunta transporta ata 200 persoas ao día desde Santiago ata Sarria para iniciar o Camiño

O Xacobús da Xunta rexistrou nas últimas semas un aumento de viaxeiros, con ata 200 persoas trasladadas ao día desde Compostela ata Sarria para iniciar o Camiño de Santiago.

Esta liña, que vai desde Pedrafita do Cebreiro ata Santiago de Compostela, está activa todo o ano para facilitar que os peregrinos se poidan desprazar para facer calquera etapa galega do Camiño Francés ou para a volta á Santiago.

Ademais este servizo permite o traslado gratuíto de bicicletas ata completar a capacidade do vehículo.

No inicio de xullo, a maior afluencia de peregrinos no Camiño reflíctese tamén na demanda do Xacobús, cunha incidencia especial nas viaxes entre Santiago de Compostela e Sarria. Esta localidade marca o inicio das 5 etapas que constitúen o tramo mínimo para conseguir a Compostela, polo que é un punto importante de desprazamentos desde Compostela.

Na semana do 27 de xuño ao 3 de xullo, máis de 800 persoas viaxaron de Santiago de Compostela a Sarria no Xacobús. A maioría, 528, fixérono os primeiros días do mes de xullo: 131 o venres, 200 o sábado e 197 o domingo.

Ademais da demanda do Xacobús, a maior afluencia de visitantes e peregrinos estase notando tamén nos autobuses que conectan Santiago de Compostela con Fisterra e Muxía. En particular, rexístrase un aumento de usuarios nos servizos de regreso á capital debido aos peregrinos que realizan o Camiño ata Fisterra.

Na última semana, entre os servizos que realizan o percorrido directo sen paradas e os que atenden tamén localidades intermedias, viaxaron de Santiago de Compostela a Fisterra 701 persoas, facendo o camiño de regreso 1.078 usuarios.