Trenor anima aos representantes dos Centros Comerciais Abertos e federacións a solicitar as axudas de 2,75M€ para impulsar o comercio de proximidade
A Vicepresidencia primeira e Consellería de Economía, Industria e Innovación ten abertos ata o 27 de xullo dous programas para este tipo de asociacións, que poderán financiar así diferentes iniciativas de promoción e dinamización comercial
Por primeira vez ponse en marcha unha liña en exclusiva para os centros comerciais abertos, o que permitirá que teñan arredor dun 20% máis de orzamento ao seu dispór
A Administración autonómica vén de poñer a disposición dos centros comerciais abertos un novo entorno dixital que permitirá optimizar a xestión e contar con datos máis precisos sobre o día a día do comercio galego
Noia (A Coruña), 11 de xullo de 2022
O delegado da Xunta na Coruña, Gonzalo Trenor, acompañado polo alcalde de Noia, Santiago Freire, mantiveron un encontro cos representantes do Centro Comercial Aberto de Noia para animar aos representantes dos centros comerciais abertos (CCAs) e das federacións e asociacións de comerciantes de ámbito superior ao municipal a solicitar a orde de axudas de 2,75 millóns que ten por obxectivo impulsar o comercio de proximidade galego, a través de dous programas de axudas. O representante do Goberno galego incidiou en que o prazo de presentación de solicitudes permanece aberto ata o vindeiro 27 de xullo.
Os CCAs contarán con axudas de ata 52.000 euros, en función do número de comercios asociados, apoiando así ás asociacións que atraen un maior número de negocios. Entre as actuacións subvencionables atópanse o mantemento de portais de marketplace e iniciativas de dinamización comercial e de fidelización da clientela, ademais do mantemento da unidade xerencial.
Imaxes relacionadas
