A Xunta destina 115.000 euros a diversas actuacións preventivas en montes do distrito forestal XVII o Condado-Paradanta
As accións consisten na mellora de cortalumes e pistas forestais en montes dos concellos de Ponteareas, Mondariz, Covelo, As Neves e Crecente
Santiago de Compostela, 7 de xullo de 2022
A Consellería do Medio Rural está executando traballos preventivos no distrito forestal XVII O Condado-Paradanta, que consisten fundamentalmente na mellora de pistas, cortalumes e rozas de faixas auxiliares. Realízanse en terreos de xestión pública e en zonas de alto risco de incendio (ZAR) por un importe de 115.000 euros.
Os traballos consisten na roza de faixas auxiliares e acondicionamento de pistas, así como a apertura de cunetas e a colocación de pasos de auga naqueles lugares onde son necesarios. Desta forma, mellóranse as vías de comunicación xa existentes ao monte, o que facilita o acceso do dispositivo de loita contra incendios. Tamén se acondicionan os cortalumes existentes, co fin de crear descontinuidades no monte e así evitar a propagación de incendios forestais. Como resultado final destas accións preventivas que se están a levar a cabo, actuarase nun total de 37 hectáreas de superficie e en melloras de 20 quilómetros de pistas.
Estes Estes traballos enmárcanse dentro do Plan preventivo de 2022 que contempla un investimento de 33,1 millóns de euros para poder actuar en máis de 58.600 hectáreas do territorio e en case 5.800 quilómetros de pistas forestais e outras vías de comunicación en toda Galicia.
Imaxes relacionadas
