A Xunta inicia as obras de 3 sendas nas estradas OU-105, OU-536 e na Avenida de Ponferrada, no Concello de Ourense, que suporán un investimento de 1,8 M€

Os traballos comezaron pola estrada OU-105, onde se executará unha senda de máis de 800 metros na zona de Ponte Sevilla, desde enfronte do concesionario próximo á glorieta ata o punto no que se atopa a parada de autobús máis próxima ao tanatorio

En total, habilitaranse máis de 3,5 km de sendas de uso compartido, peonil e ciclista, cun ancho mínimo de 1,80 metros para garantir unha boa accesibilidade

As rutas contarán con elementos de separación da estrada e melloraranse os sistemas de drenaxe, ademais de preinstalación de canalizacións e servizos, sinalización e colocación de varandas e sistemas de contención

O obxectivo da Consellería de Infraestruturas e Mobilidade é rematar as obras a finais deste ano ou comezos do próximo, pois teñen un prazo de execución de seis meses

Esta actuación enmárcase no Plan de sendas da comarca de Ourense, que conta cun investimento total de 7,1 M€ para 16 km de novos itinerarios

Santiago de Compostela, 5 de xullo de 2022

A Xunta iniciou as obras de execución de tres sendas nas estradas OU-105, OU-536 e na avenida de Ponferrada, no concello de Ourense.

Esta actuación supón un investimento autonómico de 1,8 M€ e permitirá mellorar a mobilidade no municipio ourensá, con actuacións na Rabaza, en Ponte Sevilla e na avenida de Ponferrada.

Os traballos comezaron pola estrada OU-105, onde se executará unha senda de máis de 800 metros na zona de Ponte Sevilla, desde enfronte do concesionario próximo á glorieta ata o punto no que se atopa a parada de autobús máis próxima ao tanatorio.

No seu conxunto, a intervención implica a execución de máis de 3,5 quilómetros de sendas de uso compartido, peonil e ciclista, que terán ancho variable cun mínimo de 1,80 metros para garantir unha boa accesibilidade.

O obxectivo da Consellería de Infraestruturas e Mobilidade é rematar as obras a finais deste mesmo ano ou a comezos do próximo, ao ter os traballos un prazo de execución de seis meses.

Máis concretamente, actuarase na marxe dereita da estrada autonómica OU-105, executando un itinerario de algo máis de 800 metros na zona de Ponte Sevilla, fronte ao concesionario situado xunto á glorieta e ata o punto onde se atopa a parada de bus próxima ao tanatorio.

Tamén se lle dará continuidade peonil ao treito de beirarrúa que existe na marxe dereita ao comezo da ruta, estendéndose ata o desvío do tanatorio As Burgas. O desvío ao tanatorio será o punto final da senda, que se prolongará nas obras que realiza a Xunta en Seixalbo, no marco da 2ª fase de mellora da seguridade cun investimento de case 1 M€.

Executarase, ademais, un novo itinerario de case 1,5 km na estrada que vai a Trives, na estrada OU-536, na Rabaza, pola marxe esquerda da vía. A senda partirá do paso de peóns no cruzamento co camiño de Souto Sanín, seguirá pola esquerda e desviarase polo terraplén cara á rúa B, continuando ata acadar a intersección coa OU-536 (no quilómetro 2+400).

A terceira das sendas realizarase na avenida de Ponferrada, tamén pola marxe esquerda. O itinerario desenvolverase ao longo de 1,1 km, desde a avenida de Buenos Aires ata a glorieta que hai no quilómetro 1+950 da estrada OU-536 na Rabaza.

As sendas irán separadas da vía por distintos elementos, en función das necesidades: gabia revestida e con peitoril de seguridade, franxa de vexetación, bordo prefabricado ou combinación destes elementos. Efectuaranse muros de sostemento en distintos puntos das 3 estradas nos treitos onde se executan os novos itinerarios.

Tamén se ampliará a plataforma da estrada OU-536, cunha estrutura en voadizo ancorada ao muro existente no quilómetro 1+765; melloraranse os sistemas de drenaxe; e deixarase disposta a preinstalación de canalizacións e servizos, ademais de sinalización e a colocación de varandas e sistemas de contención.

As actuacións están cofinanciadas con fondos europeos do programa operativo Feder Galicia 2014-2020.

O departamento que dirixe Ethel Vázquez continúa co seu compromiso de mellora da rede viaria autonómica para favorecer os desprazamentos a pé de modo máis seguro e sustentable.

Imaxes relacionadas

Infraestruturas

Departamento:

C. de Vivenda e Planificación de Infraestruturas