A Xunta reactiva desde mañá o servizo de autobús entre o centro de Ferrol e as praias de San Xurxo e de Doniños
Recupérase o funcionamento da liña de autobús cara as praias, que o ano pasado tivo unha grande acollida entre os usuarios, e que se estará en servizo ata o 31 de agosto
O servizo cubrirá o percorrido praza de Galicia, Porto, San Xurxo e praia de Doñinos, e regreso polo mesmo itinerario
A liña de autobús disporá de 4 servizos de ida e de volta de luns a venres, e de 6 servizos os sábados, domingos e festivos
A Consellería de Infraestruturas e Mobilidade reactiva desde mañá os servizos de autobús da Xunta entre o centro de Ferrol e as praias de San Xurxo e de Doniños.
Recupérase así o funcionamento da liña de autobús especial praias, que permanecerá en servizo ata o 31 de agosto, e que o ano pasado tivo unha gran acollida por parte dos usuarios do transporte público da Xunta.
O servizo cubrirá o percorrido praza de Galicia, Porto, San Xurxo e praia de Doñinos, e regreso polo mesmo itinerario.
A liña de autobús, disporá de 4 servizos de ida e volta de luns a venres, e 6 servizos os sábados, domingos e festivos.
A saía será desde a praza de Galicia ás 15,00 horas, ás 16,00, ás 18,30 e ás 19,30 horas. Ademais, na fin de semana, existirá un servizo especial ás 12:00 e ás 17:00 horas.
As saídas desde Doniños serán tamén diarias, ás 15,30 horas, ás 16,30, ás 19,00 e ás 20,00 horas, cun servizo especial en sábados e domingos ás 12,30 e ás 18,00 horas.
O prezo de tarifa do billete será de 1,55 euros, reducíndose ata os 0,88 euros para os usuarios da tarxeta de Transporte Metropolitano de Galicia (TMG). Ademais, os menores de 21 anos poderán viaxar de xeito gratuíto coa tarxeta Xente Nova da Xunta.
A información dos horarios dos servizos de autobús da Xunta e a nova configuración das paradas que se engaden poderán ser consultadas na web www.bus.gal.