A conselleira do Mar, Rosa Quintana, mantivo hoxe un encontro con representantes das confrarías de Ferrol e Barallobre e de distintas organizacións sindicais para analizar a situación da ría de Ferrol. Nela, a representante da Xunta explicou que as últimas mostraxes realizadas na zona revelan unha melloría nalgunhas das especies de moluscos bivalvos presentes nos bancos e asegurou que a Xunta vai seguir facendo os traballos que sexan necesarios para elevar a produción e consolidar os aumentos de ingresos rexistrados polo sector nos últimos anos.

A titular de Mar, que estivo acompañada pola delegada territorial da Xunta en Ferrol, Martina Aneiros, e pola directora xeral de Desenvolvemento Pesqueiro, Susana Rodríguez, detallou que o stock comercial de ameixa xaponesa na zona norte do banco das Pías é superior ao dos últimos anos, o que permitirá manter ou incrementar as capturas. En canto ao berberecho, a biomasa de talle comercial tamén é a maior dos últimos cinco anos, polo que se prevé un incremento das capturas.

Mentres, no caso da ameixa fina o stock de exemplares adultos é lixeiramente inferior ao de 2021, polo que se esperan resultados de extracción semellantes aos do ano pasado, e no da ameixa babosa -a especie tradicionalmente máis importante da ría- a biomasa de talle comercial é algo superior á do pasado exercicio tras dous anos consecutivos de bo recrutamento.

A representante da Xunta salientou que aínda queda moito traballo por facer para recuperar os niveis de produción da ría de anos pasados, pero incidiu en que se están a centrar todos os esforzos nese obxectivo e que xa hai algúns resultados. Nesa liña, lembrou que as cifras de facturación pola venda de moluscos bivalvos na ría de Ferrol acadaron en 2021 os 2,8 millóns de euros, a cifra máis alta dos últimos catro anos e por enriba da media de 2,6 millóns de euros rexistrada desde 2009. A produción, con máis de 300 toneladas de produto, está algo por debaixo da media dos últimos 13 anos, o que demostra a importancia de apostar pola mellora da comercialización.

Traballos na zona

A titular de Mar lembrou que a Administración galega está a desenvolver desde 2019 distintas medidas para a mellora dos bancos marisqueiros da ría de Ferrol e que fai un seguimento constante das poboacións, o que determinará a posibilidade de realizar novas actuacións en caso de que sexa necesario.

O plan executado desde 2019 foi artellado en base a criterios técnicos sobre as necesidades mostradas pola ría de Ferrol en termos produtivos e contou cun orzamento de arredor de 800.000 euros. As accións desenvolvidas incluíron o seguimento das poboacións de moluscos bivalvos de interese comercial, o control dos talles, a remoción de substrato nunha superficie de máis de 85.000 metros cadrados para aumentar a biodiversidade da zona ou a adición de 40.000 metros cúbicos de áridos en máis de 25.000 metros cadrados ao este do banco das Pías, unha medida proposta polas propias confrarías de Ferrol e Barallobre.

A estas tarefas engadiuse a retirada de estrelas de mar -especie depredadora dos moluscos e unha das principais causas de mortalidade do recurso nos últimos anos- cunha presenza especialmente elevada no pasado inverno e que afectou principalmente á biomasa da ameixa babosa.

Por iso, a conselleira defendeu a necesidade de recorrer a todas as vías para mellorar o estado dos bancos marisqueiros e lembrou que a Xunta está a traballar coa Estación Biolóxica da Graña no estudo das causas que reducen a produción da ría. Nesta liña, lamentou a falta de apoio da Administración central neste eido pois en setembro de 2018 a Delegación do Goberno en Galicia comprometeuse coas confrarías a encargar un estudo técnico e biolóxico da ría ao Centro de Estudos e Experimentación de Obras Públicas (Cedex), pero semella que esa análise aínda non se iniciou.