Rueda gaba a implicación das empresas e a sociedade civil na loita contra o cambio climático

O presidente da Xunta, Alfonso Rueda, gabou hoxe a implicación das empresas e a sociedade civil na Alianza Galega polo Clima para traballar, unidos e cos mesmos obxectivos, na loita contra o cambio climático.

“Universidades, autoridades portuarias, empresas e industria e outras entidades unimos hoxe as nosas forzas e todos xuntos, sector público e privado, traballaremos cos mesmos obxectivos e a mesma filosofía: deixar unha Galicia mellor ás vindeiras xeracións”, abundou.

Durante o acto de sinatura, Rueda lembrou que hai moitas maneiras de contribuír a frear o cambio climático: “Fano as industrias que modifican o seu sistema de produción para facelo máis eficiente e sustentable; fano as universidades cando investigan e deseñan sistemas para favorecer esa produción respectuosa co medio; e fano as empresas que optan por produtos máis sostibles e ecolóxicos ou que desenvolven tecnoloxía que mellora e preserva a contorna”.

Nesta liña, salientou a oportunidade que supoñen os fondos europeos Next Generation para consolidar e impulsar iniciativas innovadoras como o proxecto para desenvolver fibras téxtiles a partir da madeira.

Ao longo da súa intervención, o titular do Goberno autonómico explicou que formar parte desta alianza supón asumir as liñas estratéxicas que cada ano se irán marcando, ademais dunha serie de deberes, como: establecer accións dirixidas á mitigación do cambio climático en Galicia; fomentar o intercambio de información científica, tecnolóxica, socioeconómica ou xurídica sobre esta materia; promover e apoiar a investigación vinculada ao clima; ou impulsar o desenvolvemento e a difusión de tecnoloxía para a transición cara a sistemas de enerxía de baixas emisiones.

Galicia continúa a senda comezada hai xa uns anos

Alfonso Rueda aseverou que, con esta sinatura, a Comunidade continúa a senda comezada hai xa uns anos pola Xunta: coa posta en marcha da Estratexia galega de cambio climático e enerxía 2050, unha folla de ruta aprobada en 2019 e cuxo primeiro plan operativo 19/23 conta con 171 medidas e cun investimento de preto de 1.300 millóns de euros; coa Estratexia galega de economía circular 2020-2030; coa Lei de residuos e solos contaminados de Galicia; co Pacto das alcaldías para o clima e enerxía, ao que están adheridos 285 concellos; e coa futura Lei do Clima de Galicia que, previsiblemente, estará aprobada a finais deste ano 2022.

Así mesmo, destacou o obxectivo de acadar a neutralidade climática no 2050. Un esforzo e compromiso que xa está a dar os seus froitos, xa que Galicia logrou reducir as emisións de gases de efecto invernadoiro case un 36% desde 1990, o que supón máis de 30 puntos menos que a media nacional.

O presidente da Xunta concluíu facendo fincapé en que esta alianza é un pacto aberto ao que poderán adherirse todas aquelas entidades que o desexen, “porque queda moito por facer, pero xuntos será máis doado”, sentenciou.