A Xunta lamenta que a nova Lei de universidades siga sen solucionar os problemas estruturais e poida xerar desigualdades no sistema

O secretario xeral de Universidades, José Alberto Díez de Castro, participou hoxe en Madrid na Conferencia General de Política Universitaria, convocada para analizar o texto da nova Lei Orgánica do Sistema Universitario impulsado polo Goberno do Estado. Na súa intervención, o representante da Xunta de Galicia volveu lamentar -como xa o fixera na reunión do pasado novembro- que o Goberno do Estado siga adiante cunha norma elaborada ás costas dos axentes implicados e que non dá resposta a ningún dos problemas estruturais das universidades españolas e que pode xerar desigualdades no sistema a nivel estatal.

“En xeral -explicou o secretario xeral de Universidades- non se inclúen modificacións substanciais nun texto que adoece dunha falta de modelo global e valente que leve á universidade española aos niveis de prestixio e de calidade que lle corresponden”. Alertou ademais de que “a desregularización de temas de gran importancia como son a gobernanza , as acreditacións ou o desenvolvemento de figuras contractuais no persoal docente pode dar lugar a desigualdades non desexables” no Sistema Universitario Español.

Así pois, Díez de Castro denuncia a “oportunidade perdida para acadar unha lei con vocación de pervivencia” que debería ser deseñada contando coas aportacións do conxunto da comunidade universitaria.

Financiamento

No que atinxe ao financiamento das universidades, o representante da Consellería de Cultura, Educación, FP e Universidades explicou que Galicia xa cumpre “de sobra” cos requisitos establecidos no texto da lei (financiamento estrutural, por obxectivos e necesidades singulares) con plans quinquenais, un modelo de necesidades estruturais de docencia e investigación, un panel de indicadores e I+D+i. De feito, lembrou o consenso acadado na elaboración do Plan de Financiamento Universitario de Galicia 2022-2026, un documento acordado entre as partes que mobilizará máis de 3.200M€ no vindeiro quinquenio, a maior achega da historia da Xunta de Galicia ás universidades públicas.

Non obstante amosouse moi escéptico co mandato normativo de establecer un mínimo do 1% do PIB á educación universitaria pública en España sen que leve aparellado ningún compromiso de apoio financeiro por parte do Estado. Subliñou, ademais, que a dependencia financeira das aportacións autonómicas “é moi forte, mentres que a dependencia do Estado é anecdótica”.

Gobernanza

En materia de gobernanza, Galicia lamenta a “deixación de funcións” do Goberno do Estado neste eido, o que pode provocar unha heteroxeneidade de regulacións en todo o territorio, así como a eliminación da proposta inicial de redución o número de membros do Claustro, do Consello de Goberno e do Consello Social.

Pola contra, a Xunta defende -seguindo as recomendacións dos expertos e a dinámica dos sistemas universitario europeos- un modelo máis xerencial, cun maior liderado individual e redución dos órganos de goberno, que asegure a capacidade de xestión dos futuros equipos reitorais. Tamén se insistiu na necesidade de incorporar unha representación da comunidade autónoma ao Consello de Goberno.

Centros de investigación e persoal

No que atinxe ao ámbito da investigación, José Alberto Díez de Castro tachou o texto de “inmobilista” e que non responde á dinámica modernizadora de todos os organismos universitarios que se dedican á investigación, que reclaman estruturas máis flexibles e especializadas.

Canto ao profesorado, o texto tampouco aporta melloras nos procesos de acceso e promoción dos corpos docentes, que resulta básico para mellorar a calidade do sistema.

Finalmente, o representante da Xunta denunciou a falta de transparencia ao longo de todo o proceso de tramitación da nova lei de Universidades, sen mesas de traballo que posibilitaran discusións en aberto, o que “compromete unha visión global de futuro onde prevaleza o interese xeral”.