O DOG publica hoxe a oferta de máis de 10.300 prazas no proceso de estabilización de emprego público

A Xunta de Galicia publicou hoxe no Diario Oficial de Galicia (DOG) os decretos de Oferta de Emprego Público (OPE) da Administración Xeral e entidades instrumentais do sector público autonómico, do ámbito sanitario do Servizo Galego de Saúde (Sergas) e do ámbito de ensino da Consellería de Educación, Formación Profesional e Universidade para a oferta de 10.336 prazas no proceso de estabilización de emprego establecido na Lei 20/21 do 28 de decembro, de medidas urxentes para a redución da temporalidade no emprego público.

A Lei distingue dous tipos de procesos: un de estabilización mediante o sistema de concurso de méritos no que se valorarán exclusivamente os méritos e outro a través do sistema de concurso-oposición que comporta a realización de exames.

O primeiro dos procesos empregarase para seleccionar todas as prazas que estivesen ocupadas de forma temporal e de xeito ininterrompido con anterioridade ao 1 de xaneiro de 2016, mentres que o segundo será de aplicación ás prazas ocupadas de forma temporal e ininterrompidamente polo menos os tres anos anteriores ao 31 de decembro do ano 2020.

Con esta oferta dáse cumprimento ao establecido na Lei 20/21 de medidas urxentes para a redución da temporalidade no emprego público. As correspondentes convocatorias deberán publicarse antes do 31 de decembro deste ano.

Así mesmo, resérvase para seu acceso pola quenda de discapacidade o 7% do total das prazas que se inclúen na oferta. Coa incorporación de persoal fixo nestas prazas de estabilización, máis as prazas xa convocadas, a taxa de temporalidade situarase por debaixo do obxectivo do 8% fixado pola lexislación do Estado.

Administración Xeral, Sanidade e Ensino

No que se refire ao eido da Administración, das 6.480 prazas ofertadas, 4.641 correspóndense con prazas de emprego público na Administración Xeral e 1.839 con prazas das entidades do sector público autonómico.

Pola súa banda, o número total de prazas que o Servizo Galego de Saúde oferta é de 2.568, das que 760 cubriranse polo sistema de concurso-oposición e 1.808 polo procedemento excepcional de concurso.

No relativo á oferta de emprego público para postos docentes, aprobáronse un total de 1.281 prazas. Delas, 1.156 polo sistema de concurso de méritos, que se abrirá a partir do último trimestre do ano. As restantes 125 prazas desenvolveranse polo sistema de concurso-oposición, que se convocará no último trimestre do ano e cuxas probas se celebrarán o próximo verán. Prevese rematar este proceso de estabilización en 2023 cunha taxa de interinidade docente do 6% no conxunto das prazas.