A conselleira de Infraestruturas e Mobilidade, Ethel Vázquez, e o presidente da Fundación dos Ferrocarrís de Galicia e delegado territorial da Xunta en Lugo, Javier Arias, selaron vía telemática o convenio de cooperación
A Xunta colabora na promoción do Museo Galego do Ferrocarril, en Monforte de Lemos, cunha achega de 30.000 euros
O acordo ten como obxectivo o mantemento do patrimonio industrial ferroviario do museo, promocionar as actividades de exhibición dos seus fondos e difundir os beneficios socioeconómicos e medioambientais deste medio de transporte
Este convenio estará vixente ata o vindeiro 31 de decembro e financiará as actividades realizadas desde o 1 de xaneiro deste ano
A conselleira de Infraestruturas e Mobilidade, Ethel Vázquez, e o presidente da Fundación dos Ferrocarrís de Galicia e delegado territorial da Xunta en Lugo, Javier Arias, asinaron o convenio de colaboración para promocionar o Museo Galego do Ferrocarril, en Monforte de Lemos, cunha achega de 30.000 euros neste ano por parte da Xunta.
O convenio de colaboración foi selado vía telemática e estará vixente ata o vindeiro 31 de decembro, incluíndo a financiación das actividades realizadas desde o 1 de xaneiro deste ano.
Mediante este acordo a Xunta apoia o mantemento do Museo Galego do Ferrocarril, que alberga un importante patrimonio industrial ferroviario, e a promoción das actividades de exhibición dos seus fondos materiais.
Neste marco de promoción do museo, inclúense tamén actividades de divulgación do patrimonio que alberga o museo entre a sociedade, xunto co fomento do ferrocarril como modo de transporte sustentable.
Ademais do esforzo que nos últimos anos a Xunta está a levar a cabo na planificación e execución da oferta intermodal de transporte na Comunidade e das infraestruturas do transporte de viaxeiros en colaboración coas distintas administracións públicas, o Goberno galego tamén é consciente da importancia de conservar e preservar elementos tradicionais representativos dos diferentes modos de transporte e, máis concretamente, do transporte ferroviario.
Deste xeito, mediante o convenio asinado hoxe o departamento que dirixe Ethel Vázquez busca garantir o mantemento do patrimonio do museo cara ao futuro e difundir os beneficios socioeconómicos e medioambientais deste medio de transporte.