O IV Concurso de Podcasts 'Radio na biblio' premia o traballo de centros de Cedeira, Malpica, A Guarda, Vigo e A Coruña polo Día das Letras Galegas
O certame, impulsado pola Xunta, dedícase cada ano á persoa homenaxeada con motivo Día das Letras Galegas, neste caso a Florencio Delgado Gurriarán
Os programas radiofónicos serán emitidos pola Radio Galega e serán difundidos a través da súa páxina web e da canle dixital do Diario Cultural
A Xunta de Galicia, en colaboración coa Radio Galega, vén de premiar o traballo de centros de Cedeira, Malpica, A Guarda, Vigo e A Coruña no o IV Concurso de Podcasts Radio na biblio, que este ano se centra na figura do poeta, articulista, tradutor, editor, activista cultural e político no exilio Florencio Delgado Gurriarán. O obxectivo do certame é estimular, mediante o recoñecemento de boas experiencias, a elaboración de produtos radiofónicos en galego, reforzar a lectura de poesía nesta lingua ou o achegamento ao mundo da edición, da tradución e da cultura galega en América.
O certame consta de catro modalidades, segundo o nivel do ensino (Infantil e primeiro ciclo de Primaria, resto de Primaria, ESO e unha cuarta para Bacharelato, ensinanzas de persoas adultas ou ciclos formativos). Os traballos premiados, cada un deles cunha asignación de 1.000€, en cada unha delas son os seguintes:
Modalidade | Definición | Centro | Concello | Provincia | Podcast |
I | Infantil e 1º/2º de Primaria | CEIP Nicolás del Río | Cedeira | A Coruña | Poemas crioulos |
II | 3º a 6º de Primaria | CEIP Milladoiro | Malpica de Bergantiños | A Coruña | Unha regueifa a Don Florencio |
CEIP As Solanas- Nicolás Gutiérrrez Campo | A Guarda | Pontevedra | A treboada de Corgomófilo | ||
CEIP Manuel Rodríguez Sinde | A Guarda | Pontevedra | De volta en volta | ||
CEP Dr. Fleming | Vigo | Pontevedra | A hora de Galicia | ||
III | ESO | IES P. Rafael Dieste | A Coruña | A Coruña | A heroica vida de Florencio |
IV | Bacharelato, ensinanza de Persoas Adultas ou FP | EOI da Coruña | A Coruña | A Coruña | Choiva ou pluie – Florencio Delgado Gurriarán |
CEE Saladino Cortizo | Vigo | Pontevedra | Domadora de serpes |
Os equipos galardoados poderán visitar as instalacións da Radio Galega en Santiago de Compostela. Os traballos premiados serán emitidos por esta emisora e serán difundidos a través da súa páxina web e da canle dixital do Diario Cultural.
Puideron participar neste concurso os 138 centros públicos participantes no programa Radio na Biblio, da Consellería de Cultura, Educación e Universidade, así como outros centros que traballan xa co laboratorio de radio como ferramenta pedagóxica. Nesta cuarta edición do certame participaron 70 centros educativos que enviaron 105 traballos.
O certame enmárcase no Plan LÍA (Lectura, Información e Aprendizaxe) 2021/2025 de Bibliotecas Escolares, que contempla o reforzo dos programas que inciden na formación do alumnado no seu acceso aos medios de comunicación, como é o caso, con propostas que promovan o coñecemento e un uso responsable da información en múltiples formatos.