Os axentes medioambientais da Xunta comisan 17 troitas de talle ilegal a un pescador do Valadouro
A orde de pesca fluvial fixa un máximo de 6 exemplares ao día por persoa e un talle mínimo de 19 centímetros
Os axentes tamén lle incautaron unha cana mentres pescaba nun afluente do río Ouro
Os axentes medioambientais da Xunta de Galicia comisaron 17 troitas de talle ilegal a un pescador no concello do Valadouro.
Os axentes membros da Consellería de Medio Ambiente, Territorio e Vivenda detectaron a presenza dun pescador, nun afluente do río Ouro, que posuía 17 exemplares desta especie piscícola con tamaños comprendidos entre os 11 e 18 centímetros. Asemade, tamén se lle confiscou unha cana.
Cómpre recordar que a orde anual na que se recollen as normas xerais de pesca nas augas continentais da Comunidade, publicada no Diario Oficial de Galicia do pasado 22 de febreiro, fixa a posibilidade de capturar 6 exemplares ao día por persoa, cun talle mínimo de 19 centímetros.
Polo tanto, o pescador capturou troitas de tamaño inferior ao legal e, ao mesmo tempo, excedeu a cota de exemplares.
A Consellería sinala que non respectar as limitacións de número, peso ou tamaño son accións que poden ser sancionadas con multas de ata 3.000 euros, tal e como se fixa na Lei de pesca continental de Galicia.