A Xunta homenaxea a Camilo José Cela no 106 aniversario do seu nacemento

A Xunta homenaxeou o escritor Camilo José Cela hoxe, data do 106 aniversario do seu nacemento, cunha ofrenda floral no cemiterio de Santa María de Adina, en Padrón. O secretario xeral de Cultura, Anxo M. Lorenzo, participou no acto conmemorativo e, posteriormente, asistiu á lectura pública da obra A Rosa, unha iniciativa promovida polo alumnado de distintos centros de ensino na honra do escritor padronés.

Na súa intervención, o representante da Consellería de Cultura, Educación e Universidade apuntou o carácter especial da homenaxe deste ano, no que a Xunta conmemora o 20 aniversario da morte do Nobel galego con diversas iniciativas para poñer en valor a súa figura e legado. Entre elas referiuse á musealización da locomotora coñecida como Sarita, tras o proceso de restauración que se está desenvolver na peza principal do Museo do Ferrocarril. Ademais, ao longo de 2022 desenvolveranse diversos proxectos expositivos, xornadas académicas e outras accións a prol do achegamento da cidadanía á vida e obra do escritor. 

Cómpre sinalar que a ofrenda floral realizada hoxe forma parte da programación deseñada pola Fundación Camilo José Cela no marco de Letreseo, celebración arredor das Letras Galegas que comezou o pasado luns e se prolonga ata o 20 de maio. Así, nestes días estanse a realizar neste espazo actividades especiais para centros escolares e xornadas de portas abertas para todos os públicos.

Esta mesma tarde terá lugar unha visita teatralizada a cargo de Suso Martínez como Matías Martí. Nela o actor lembrará o seu compañeiro Pedro Brandaríz, falecido en febreiro, e co que tiña previsto ofrecer un espectáculo arredor de Camilo José Cela. Xa a vindeira semana, o mércores 18, Día Internacional dos Museos, ofrecerase o espectáculo divulgativo de narración oral Tertulias clandestinas con Camila Trulock Bertorini.