A Xunta incrementa nun 15% as axudas para contratar socorristas nas praias e piscinas de Ferrolterra durante este verán

A Xunta de Galicia, a través da Consellería de Emprego e Igualdade, incrementou este ano nun 15% as axudas para a realización de obras ou servizos de interese xeral e social que os concellos soen destinar á contratación de servicios de vixilancia de praias, espazos fluviais ou piscinas nas comarcas de Ferrol, Eume e Ortegal. Así o avanzou a delegada territorial da Xunta en Ferrol, Martina Aneiros, que indicou que o departamento autonómico xa comunicou á maioría dos concellos as axudas concedidas para que poidan tramitar a contratación destes profesionais.

O investimento da Xunta nesta convocatoria é próximo aos 175.000 euros, contía que se destinará a apoiar a contratación de 53 traballadores -sete máis que o ano pasado- nun total de dez municipios dos 20 que conforman as tres comarcas. As localidades que reciben as axudas para a contratación de socorristas este ano son os de Ares, Cabanas, Cariño, Cedeira, Ferrol, Mañón, Monfero, Mugardos, Ortigueira e Pontedeume.

Martina Aneiros lembrou que a Administración autonómica vén mantendo un compromiso constante durante os últimos anos cos servizos de socorrismo, de competencia municipal. “Trátase dun apoio moi importante sen o que os concellos terían moitas dificultades para poder financiar estes servizos de vixilancia que son fundamentais para garantir a seguridade de veciños e visitantes nos espazos acuáticos durante esta temporada estival”, puntualizou a delegada territorial.

O Goberno autonómico inviste 1,5 millóns de euros para apoiar en preto de 200 concellos galegos a contratación de máis de 450 desempregados e desempregadas con cargo a esta convocatoria. Os contratos serán de tres meses -no caso de que sexan a tempo completo- ou de seis meses para os de tempo parcial con contías que irán dos 1.555 aos 2.700 euros segundo o grupo de cotización das persoas contratadas.

Con esta medida a Xunta persegue mellorar a empregabilidade das persoas participantes e colaborar coas entidades locais  co obxectivo de dinamizar o mercado laboral galego.

DISTRIBUCIÓN POR CONCELLOS DAS COMARCAS DE FERROL, EUME E ORTEGAL DAS AXUDAS Á CONTRATACIÓN DE SERVIZOS DE SOCORRISMO EN ESPAZOS ACUÁTICOS