Xunta e federacións deportivas acuáticas analizan medidas para minimizar o risco da práctica destas modalidades

Santiago, 10 de maio de 2022.- A conselleira do Mar, Rosa Quintana e o secretario xeral para o Deporte, José Ramón Lete Lasa, mantiveron na mañá de hoxe unha xuntanza cos responsables das federacións deportivas acuáticas -Pesca, Actividades Subacuáticas, Socorrismo, Motonáutica, Natación, Piragüismo, Remo, Salvamento e Socorrismo, Surf, Tríatlon e Vela- para analizar as posibles iniciativas ou medidas para minimizar os riscos nas prácticas das súas modalidades.

Deste xeito, os participantes na reunión coincidiron na necesidade de realizar campañas de sensibilización, formación e información para dar a coñecer a lexislación vixente e as distintas medidas de prevención; mellorar os períodos de balizamento nas praias, a través das entidades locais; a necesidade de propoñer ás administracións competentes -Marina Mercante e Ministerio de Transportes, Movilidad y Agenda Urbana- a necesidade de control dos títulos de navegación; así como en propoñer o incremento dos medios de vixilancia e control.

Por outra banda, a conselleira e o secretario xeral informaron que nas vindeiras datas reuniranse coa Axencia Galega de Emerxencias para analizar outras posibles medidas a implementar.