A Xunta inviste preto de 126.000 euros na mellora dos viarios e aparcadoiros do hospital de Monforte de Lemos
O delegado territorial de Lugo, Javier Arias, explica que as obras de reforzo do firme na contorna do centro hospitalario quedarán completadas esta semana
Monforte de Lemos (Lugo), 10 de maio de 2022 A Consellería de Infraestruturas e Mobilidade está a traballar na mellora do firme dos viarios e áreas de aparcamento do hospital público de Monforte de Lemos, onde inviste 125.800 euros.
O delegado territorial da Xunta en Lugo, Javier Arias, comprobou a marcha das obras, que consisten na realización de fresados e a reposición da capa de rodaxe con mestura bituminosa en quente. A intervención inclúe a substitución do pavimento da área de Urxencias.
Arias apuntou que a finais desta semana está previsto rematar os traballos, que se completarán coa renovación da sinalización horizontal e o reforzo dos indicadores verticais.
As obras enmárcanse no proxecto de mellora do firme nos centros hospitalarios da área sanitaria, incluídos o Lucus Augusti (Hula) e o hospital de Calde, na cidade de Lugo, onde as melloras xa se executaron; así como o Hospital da Costa de Burela, onde previsiblemente comezarán as actuacións a vindeira semana.
Arias destacou que o obxectivo desta medida é corrixir o deterioro dos pavimentos e incorporar novos servizos co fin de achegar aos usuarios unhas infraestruturas máis seguras e cómodas.
Imaxes relacionadas
