O coordinador do Informe Pisa, Andreas Schleicher, coñece de primeira man o modelo educativo galego e os seus avances en materia de innovación

Santiago de Compostela, 10 de maio de 2022.- O conselleiro de Cultura, Educación e Universidade en funcións, Román Rodríguez, inaugurou esta mañá o I Congreso de Innovación Educativa e Dixital Dixinnova 2022. No acto participou tamén o director de Educación da OCDE e coordinador do informe PISA, Andreas Schleicher, que está a visitar Galicia para coñecer de primeira man o seu modelo educativo e, no caso concreto deste congreso, para afondar nos seus avances en materia de innovación. Schleicher impartiu, ademais, a conferencia de apertura deste encontro, arredor das tendencias globais que configuran a educación.

O representante da Xunta de Galicia destacou o imprescindible de formar ás novas xeracións nas competencias e destrezas que esixe a sociedade máis dixitalizada, globalizada e competitiva na que vivimos. “Desde o Goberno galego levamos máis dunha década traballando no obxectivo de formar aos nosos alumnos para os retos da sociedade do século XXI”, dixo o conselleiro, unhas accións entre as que fixo fincapé no proxecto E-Dixgal, na creación do Bacharelato de Excelencia en Ciencia e Tecnoloxías (STEMBach) ou en iniciativas pioneiras como os Clubs de Ciencia ou a creación de Espazos Maker en centros educativos.

Ademais, Román Rodríguez e Andreas Schleicher visitaron, despois da inauguración do congreso, os espazos que vai ocupar o novo Centro Galego de Educación e Innovación Dixital no Edificio Fontán da Cidade da Cultura. Esta instalación ten como obxectivo “marcar un antes e un despois na nosa folla de ruta en materia de innovación e dixitalización, potenciando e acelerando a transformación dixital da educación galega a todos os niveis”, segundo sinalou o conselleiro.

O novo centro funcionará como o órgano encargado de identificar, diagnosticar e obter conclusións sobre a realidade educativa para impulsar novos recursos de mellora das competencias dixitais, deseñar e valorar novos proxectos innovadores e a súa implementación no sistema educativo ou elaborar estudos ou informes en materia de investigación, dixitalización e innovación educativa. “En definitiva, será un espazo a través do cal dar resposta á maior necesidade de innovación e dixitalización do sistema educativo suscitada tras a crise sanitaria”, destacou Román Rodríguez.

En canto aos avances do modelo educativo galego en materia de innovación, de cara ao futuro máis inmediato, Román Rodríguez lembrou que o Goberno galego ten xa en marcha a Estratexia de Educación Dixital 2030, “dentro da que se van investir 8M€ para crear 220 Polos Creativos noutros tantos centros educativos de toda a Comunidade”.

A estratexia conta cunha dotación económica de máis de 120M€ para os tres primeiros anos e inclúe tamén a creación e deseño dun Plan Dixital para cada un dos centros de ensino, “un instrumento que permitirá a cada centro avanzar e desenvolver as competencias dixitais de alumnado e profesorado cunha folla de ruta adaptada ás súas necesidades”, incidiu o conselleiro.

Así mesmo, sinalou que os novos currículos de Primaria e Secundaria de Galicia apostan polo reforzo das competencias STEM. “De feito na Primaria reforzaremos a área de Ciencias naturais cun bloque específico de competencias STEM e en Secundaria cunha nova materia, Tecnoloxía e dixitalización”, explicou.

Román Rodríguez puxo en valor a importancia que a formación das persoas ten nas accións do seu departamento en materia de innovación e dixitalización. “Falamos dunha estratexia coordinada que inclúe novos programas, novas infraestruturas e novas liñas de acción cun único obxectivo: democratizar o acceso ás novas tecnoloxías e aos coñecementos que achegan,  dándolle oportunidades aos galegos de hoxe para que o día de mañá se desenvolvan nun mundo máis competitivo, máis innovador e máis dixitalizado”, resumiu.

Neste sentido, agradeceu o labor dos docentes, asesores e centros participantes neste I Congreso de Innovación Educativa e Dixital Dixinnova 2022. “Este encontro e as propostas que podemos ver nos expositores participantes son unha boa mostra do altísimo nivel que acadaron os centros educativos nesta materia –explicou– pero todo este nivel de coñecemento e de destrezas que hoxe demostran os profesionais dos nosos centros educativos e o noso alumnado non é froito da casualidade, senón de iniciativas que teñen como elemento central as persoas”. “Agardo que poidamos seguir traballando e avanzando xuntos neste gran reto”, rematou.

Arredor de 700 docentes de centros de ensino de Infantil, Primaria e Secundaria de Galicia, persoas coordinadoras do equipo de dinamización do Plan Dixital e de plans e programas vencellados a Estratexia de Educación Dixital 2030 da Consellería de Cultura, Educación e Universidade danse cita hoxe nesta primeira edición do congreso Dixinnova, impulsado polo departamento educativo da Xunta de Galicia.

Ademais do relatorio de apertura, a cargo de Andreas Schleicher, os asistentes poderán gozar da conferencia de Linda Liukas, programadora informática, escritora infantil e instrutora de programación nomeada pola Comisión Europea como Campioa Dixital de Finlandia en 2013, que afondará na transformación dixital no sistema educativo; así como de dúas mesas redondas na que representantes de administración, empresas e centros educativos abordarán os avances dos últimos anos neste eido.

A xornada de mañá estará centrada no alumnado, coa participación duns 700 estudantes de todos os niveis educativos, maioritariamente de 5º e 6 º de Primaria, vencellados con programas como E-Dixgal ou Digicraft.

Ademais, durante as dúas xornadas poderán visitarse os 23 expositores nos que outros tantos centros amosarán os seus proxectos arredor da impresión 3D, o espazo virtual, o metaverso, a robótica ou os drons, entre outras experiencias.