A directora de Augas de Galicia, Teresa Gutiérrez, interveu esta mañá na Comisión 2ª do Parlamento de Galicia
A Xunta reduce o caudal da concesión de Ence sobre o río Lérez nun 60%
Teresa Gutiérrez informa da emisión desta nova resolución, deixando o caudal da captación en 0,6m3/segundo, fronte aos 1,5 m3/segundo anterior
Fai fincapé nas medidas que establece a Lei de garantía de abastecemento sobre as empresas e administracións para o control da auga que se capta e se subministra, así como nas medidas para a redución das perdas de auga
Apuntou que os datos recompilados de consumos reais de auga da planta, froito da auditoría requirida a Ence desde Augas de Galicia, conclúen un consumo máximo das instalacións do 0,55 m3/segundo. Isto, indicou, deu lugar á tramitación desta nova modificación das características desta concesión, co fin de axustar o caudal ás necesidades reais de consumo de auga de Ence.
A directora de Augas de Galicia informou de que a tramitación rematou cunha nova resolución de modificación concesional, que establece unha redución do caudal para a concesión de 0,6 m3/segundo, fronte aos 1,5 m3/segundo que tiña previamente outorgados.
Subliñou que esta modificación é unha das actuacións adoptadas e promovidas nos últimos anos desde Augas de Galicia, motivada pola preocupación constante por garantir a subministración da auga e por facer un uso responsable da mesma, ante as evidencias do cambio climático. Nesta liña de traballo, lembrou, a Xunta tamén impulsou a Lei de garantía de abastecemento nos episodios de seca e en situación de risco sanitario.
Na súa intervención fixo tamén fincapé nas medidas que establece esta Lei para controlar a auga que se capta e que se subministra, así como para a redución dos volumes das perdas. Apelou á necesidade de que as empresas e os concellos adopten medidas de control para a redución do consumo innecesario e para a eficiencia na xestión.
Teresa Gutiérrez referiuse a falta de resposta por parte de moitos concellos aos requirimentos feitos por Augas de Galicia para que realicen auditorías e plans de actuación sobre as perdas das redes de abastecemento.
Concretou que a día de hoxe, das 45 administracións que responderon a Augas de Galicia, unicamente 22 contaban con información sobre perdas. O volume medio das fugas sitúase no 39,75%.
Tamén se referiu á situación do Concello de Pontevedra na captación do embalse de Pontillón de Castro, que carece de concesión, o que representa unha irregularidade desde o punto de vista da Lei de Augas.