A Xunta adxudica a redacción do proxecto para construír unha glorieta na intersección das estradas autonómicas LU-530, LU-740 e LU-730 na Fonsagrada
O contrato, adxudicado por un importe de máis de 18.000 euros, conta con 9 meses de prazo para a redacción do proxecto
O obxectivo é mellorar a seguridade na intersección das citadas estradas autonómicas, que conta actualmente cunha disposición de glorieta partida
A nova rotonda funcionará como elemento redutor de velocidade no inicio do treito urbano da travesía da LU-530, que é a vía que soporta maior tráfico das tres
A Xunta continúa traballando na mellora da rede viaria autonómica para ofrecerlles aos cidadáns unhas estradas cómodas, seguras e eficientes
A Consellería de Infraestruturas e Mobilidade adxudicou a redacción do proxecto de construción dunha glorieta na intersección das estradas LU-530, LU-740 e LU-730, na Fonsagrada.
O contrato, adxudicado ao consultor SEPCO S.L. por máis de 18.000 euros, conta con 9 meses de prazo para a redacción do proxecto.
O obxectivo da intervención é mellorar a seguridade na intersección das citadas estradas autonómicas na Fonsagrada, que conta actualmente cunha disposición de glorieta partida.
As obras realizaranse na contorna do punto quilométrico 57+000 da estrada autonómica LU-530.
A reforma da intersección, para configurala como unha glorieta completa, implicará unha mellora da seguridade viaria desde o punto de vista da ordenación dos xiros.
Ademais, a rotonda funcionará como elemento redutor de velocidade no inicio do treito máis urbano da travesía da LU-530, que é a vía de maior tráfico das que conflúen nesta intersección.
O contrato adxudicado deberá deseñar a glorieta e o seus entronques, así como prever a reposición daqueles servizos que se poidan ver afectados pola actuación.
Tamén deberá considerarse a incidencia do deseño na mobilidade peonil, así como a integración urbana da propia rotonda.
A Xunta continúa traballando na mellora da rede viaria autonómica para ofrecerlles aos cidadáns unhas estradas cómodas, seguras e eficientes.