Trenor supervisa a chegada de tres marquesiñas entregadas pola Xunta ao concello de Muros
O obxectivo é dotar de instalacións axeitadas as paradas das liñas dos servizos de transporte interurbano de viaxeiros que ofrezan aos usuarios unha protección fronte ás inclemencias meteorolóxicas e melloren a comodidade durante a espera
Ao longo dos próximos días o Goberno galego seguirá entregando máis marquesiñas aos concellos da provincia que as solicitaron
Muros (A Coruña), 27 de abril de 2022.- O delegado da Xunta na Coruña, Gonzalo Trenor, acompañado pola alcaldesa de Muros, María Inés Monteagudo, supervisou esta mañá a chegada de 3 novas marquesiñas entregadas pola Xunta ao Concello co obxectivo de ofrecer aos usuarios do transporte público unha espera máis cómoda.
O delegado da Xunta, apuntou, que “os novos refuxios, están sendo entregados aos concellos para que procedan á súa colocación co compromiso de garantir tamén o seu mantemento”.
O obxectivo da Xunta é dotar de instalacións axeitadas as paradas das liñas dos servizos de transporte interurbano que ofrezan ao usuario unha protección fronte ás inclemencias meteorolóxicas e melloren a comodidade durante a espera. As marquesiñas contan cun deseño integrado na paisaxe, adaptadas á contorna rural, e co emprego de materiais autóctonos como a madeira.
Trenor destacou que ao longo dos vindeiros días a Xunta irá entregando máis marquesiñas aos distintos concellos da provincia que as solicitaron.
Esta iniciativa da Xunta inclúese dentro dun contrato licitado o ano pasado por importe de 1,2 millóns de euros para a renovación de 200 marquesiñas, que se suma a unha primeira fase levada a cabo no ano 2018 mediante a que se instalaron un total de 152 refuxios, con deseños diferenciados para os ámbitos urbanos ou rurais.
O representante do Goberno galego lembrou que o pasado mes de abril tamén se licitou un novo contrato por 250.000 euros para a instalación de outras 43 novas marquesiñas, nas marxes das estradas autonómicas das catro provincias. Neste caso, será a propia Consellería de Infraestruturas e Mobilidade a encargada de colocar os novos refuxios en vías da Xunta ao seu paso por un total de 32 municipios, complementando a instalación que se está a realizar no marco de diferentes obras de seguridade viaria e a que é asumida directamente polos concellos solicitantes, como é o caso dos refuxios entregados hoxe en Muros.
O Goberno galego, que vén de completar o Plan de Transporte Público de Galicia coa renovación e modernización de máis de 3.400 liñas de autobús interurbano, continúa traballando na modernización dos servizos e das infraestruturas do transporte para responder de xeito eficiente ás necesidades reais dos cidadáns en materia de mobilidade.
Imaxes relacionadas
