O mellor fútbol base europeo e a solidariedade danse a man no Torneo Internacional Jealsa de Boiro

Boiro (A Coruña), 20 de abril de 2022.- O secretario xeral para o Deporte, José Ramón Lete Lasa, presentou na mañá de hoxe o Torneo Internacional Jealsa de Fútbol Base que terá lugar no Campo de Barraña de Boiro o vindeiro 28 e 29 de maio e que contará coa participación de sesenta equipos galegos, nacionais e mesmo internacionais. Lete Lasa asegurou que, neste evento, "danse a man o mellor fútbol base europeo e a solidariedade", facendo fincapé en que o organizador, Julio Mariño, destina boa parte dos ingresos recadados á Fundación Aladina, que traballa en labores de coidado e acompañamento a nenos enfermos de cancro durante todo o proceso da enfermidade.

Lete Lasa destacou a calidade dun torneo no que participan equipos internacionais como o Vitória de Guimarães, Porto e Benfica de Portugal ou o BB Rotterdam dos Países Baixos; equipos nacionais como o Leganés, Zaragoza ou Villarreal; equipos galegos como o Dépor, Celta, Compostela, Racing de Ferrol; así como equipos do Barbanza como Cidade de Ribeira, Puebla, Crocha, Taragoña, Unión e EFM Boiro, anfitrión e organizador.

O mandatario galego destacou que o torneo boirense será "a grande festa do fútbol base europeo" tras dous anos de parón obrigado pola crise sanitaria. Unha festa que desfrutarán todos os nenos e nenas que "durante a pandemia nos deron unha lección de comportamento e que desde hoxe poden estar nas súas aulas sen máscara".    

O secretario xeral tivo palabras de agradecemento tamén para o Concello de Boiro e para os principais patrocinadores como Jealsa e recalcou a importancia dun torneo que ano tras ano, mesmo nas edicións que non se celebraron, representa unha axuda tan importante para a Fundación Aladina e para a boa marcha do deporte base galego.