A conselleira de Infraestruturas e Mobilidade, acompañada do delegado da Xunta en Pontevedra, presentou hoxe as accións previstas nestas dúas vías autonómicas, que comezarán a finais do verán e contan cun prazo de execución de 18 meses
Ethel Vázquez anuncia a licitación por 2 M€ das obras de mellora da seguridade viaria na PO-223 e na PO-224, en Santo André de Xeve, que transformarán a mobilidade nesta parroquia do concello de Pontevedra
? Son actuacións integrais que favorecerán unha contorna escolar segura, froito da colaboración con STOP Accidentes e do diálogo coa dirección do CEIP Santo André de Xeve, coa implicación dos propios alumnos do centro
? O proxecto tamén recolle as propostas de mobilidade sostible do Plan de sendas de Galicia na comarca, para enlazar dun xeito máis seguro e sostible os núcleos do Couso e Sobral, unindo os principais equipamentos da zona: o polígono empresarial, o colexio e a parroquia
Pontevedra, 20 de abril de 2022.- A conselleira de Infraestruturas e Mobilidade, Ethel Vázquez, anunciou hoxe a licitación por importe de 2 millóns de euros das obras de mellora da seguridade viaria na PO-223 e na PO-224, en Santo André de Xeve, que transformarán a mobilidade nesta parroquia do concello de Pontevedra.
Vázquez Mourelle, xunto co delegado territorial da Xunta, Luis López, achegouse hoxe á contorna do CEIP Santo André de Xeve para presentar as dúas actuacións que se levarán a cabo nestas estradas de titularidade autonómica. Tamén estiveron presentes no acto o alcalde de Pontevedra, Miguel Anxo Fernández Lores, a delegada de STOP Accidentes en Galicia, Jeanne Picard e a directora do CEIP, Carmen Gil.
A Plataforma de Contratos Públicos da Xunta recolle hoxe a licitación das obras, establecendo como prazo ata o 18 de maio para que as empresas interesadas nos traballos presenten as súas ofertas.
Segundo adiantou a conselleira, o obxectivo é iniciar os traballos a finais do verán, cun prazo de execución de 18 meses. Explicou que xa se está xa a avanzar no proceso expropiatorio das 46 fincas afectadas: en marzo convocáronse as actas previas e no mes de xuño están previstas as actas de ocupación.
A titular de Infraestruturas e Mobilidade indicou que se trata dun conxunto de actuacións integrais, ambiciosas e transformadoras para favorecer unha contorna escolar segura que suman un investimento global de máis de 2,2 M€, tendo en conta as expropiacións.
As intervencións son froito do diálogo mantido coa dirección do centro educativo, coa implicación dos propios alumnos do centro, e enmárcanse na colaboración que a Xunta mantén desde hai anos con STOP Accidentes a prol da seguridade nas vías autonómicas.
Ethel Vázquez explicou que as actuacións, nas que tamén se conxugan as propostas de mobilidade sostible recollidas no Plan de sendas de Galicia que a Xunta esta a desenvolver na comarca de Pontevedra, pretenden enlazar dun xeito máis seguro e sostible os núcleos do Couso e Sobral, ao tempo que se favorece a conexión dos principais equipamentos e focos de atracción da zona, como son o polígono empresarial, o colexio público e a propia parroquia de Xeve.
Segundo indicou Ethel Vázquez, nesa contorna melloraranse as paradas de autobús en ambas as marxes e executarase un pequeno treito de senda na glorieta da intersección coa vía a Monteporreiro, atendendo á solicitude do colectivo ciclista Pedaladas.
Estas intervencións na PO-223 completaranse coas que previstas na PO-224, na intersección onde se cruzan estas dúas estradas de titularidade da Xunta e onde se sitúa o CEIP.
Precisamente na intersección onde se produce o cruzamento de ambas as vías, executarase unha glorieta de 30 metros de diámetro que reforzará a seguridade viaria e contribuirá ao calmado de tráfico, ao producir un efecto de diminución de velocidade.
Tamén se habilitará unha senda para unir o colexio e o núcleo de Sobral. Serán 400 metros de itinerario desde a vía de acceso a Sobral ata a saída do o novo aparcadoiro do centro educativo.
Reordenaranse e ampliaranse as zonas de aparcadoiro: habilitarase un carril central de sentido único e 27 novas prazas de aparcadoiro en batería a ambos os lados, nunha parcela propiedade da Comunidade de Montes en Mancomún de Santa María de Xeve. Tamén se ampliará a zona de aparcadoiro de autobuses, incorporando 18 prazas para mestres e empregados do CEIP. Deste xeito, tal e como dixo a conselleira, ademais de conseguir unha notable mellora na zona de manobras tamén se dotarán 4 prazas para o estacionamento de autobuses.
Apuntou, tamén, unha intervención moi importante para a seguridade dos cativos: a execución dun carril exprés na fronte do colexio, un ‘kiss and ride’ que facilitará a baixada e recollida dos alumnos de xeito seguro. Tamén se reubicarán e mellorarán as paradas de autobús, reporase a capa de rodadura no treito de actuación e reforzarase a sinalización.
No marco destas actuacións instalaranse seis marquesiñas para facilitarlle aos usuarios do transporte a espera, cinco delas novas e unha que se renova.
Ethel Vázquez enmarcou as obras nos proxectos promovidos pola Xunta ao abeiro dos fondos Next Generation para fomentar a mobilidade sostible nas cidades galegas e nas súas contornas.
A este respecto, a titular de Infraestruturas, lembrou o conxunto de actuacións que a Xunta desenvolverá en Pontevedra e nos concellos da área, aos que destinará máis de 14 M€.
Ademais destas intervencións, impulsarase a transformación integral da estrada vella de Marín; melloraranse preto de 100 paradas de autobús; e habilitaranse 4 aparcadoiros: un disuasorio na contorna da estrada vella de Marín e outros tres pensados para compartir coche nas inmediacións das vías de altas prestacións de Marín, Sanxenxo e Vilagarcía de Arousa.
Imaxes relacionadas
