Os tres centros de Estudos Galegos da Xunta en Portugal unen forzas para impulsar as relacións culturais
O obxectivo é darlle espazo e visibilidade a autores e autoras do mundo académico portugués que tratan sobre diferentes aspectos de Galicia
O secretario xeral de Política Lingüística participa na presentación do volume
O secretario xeral de Política Lingüística, Valentín García, participou esta mañá na presentación do volume Galiza e(m) nós. Estudos para a comprensão do relacionamento cultural galego-português, unha iniciativa levada a cabo polos tres centros da Rede de Centros de Estudos Galegos da Xunta activos en Portugal, publicada na Coleção Hespérides Cultura do Centro de Estudos Humanísticos da Uminho.
O representante da Consellería de Cultura, Educación e Universidade explicou que o seu departamento “promove e apoia as iniciativas que, coma esta, serven para achegar Galicia a Portugal e aproveitar en todos os terreos os vínculos que unen as dúas bandas do Miño, tal e como recolle a coñecida como Lei Paz Andrade”.
Canda Valentín García tamén participaron nesta presentación, que acolleu o compostelán Pazo de San Roque, os tres editores do libro: Carlos Pazos-Justo, profesor da Universidade do Minho; María Jesús Botana Vilar, profesora da Universidade do Algarve, e Gabriel André, antigo lector da Universidade Nova de Lisboa. A presentación tamén foi seguida en liña desde os tres centros de estudos galegos que funcionan en Portugal.
Abordaxe da materia galega en Portugal
Con esta recompilación, os seus editores buscan unir forzas para darlles visibilidade aos autores do mundo académico portugués especializados na área das Ciencias Sociais e Humanas que tratan sobre diferentes aspectos de Galicia. Para tal fin, no volume foron reunidos 12 textos -algúns inéditos e outros xa publicados- agrupados en catro bloques que abarcan, dende diferentes perspectivas e áreas académicas, materia galego-portuguesa.
O primeiro dos bloques, Do passado, conta con tres textos de Luís Carlos Amaral e Teresa Soeiro, profesores da Universidade de Oporto, e Marta Lobo, profesora da Universidade do Minho. Seguidamente, en Das imagens e ideias, escriben Nuno Resende, docente da Uporto, e António Medeiros, do Instituto Universitario de Lisboa.
O terceiro bloque, Da língua e literatura, recolle catro traballos: os textos dos profesores Marco Neves, da Universidade Nova de Lisboa; Fernando Venâncio, da Universidade de Amsterdam; António Apolinário Lourenço, da Universidade de Coimbra, e José Joaquim Dias Marques, profesor da Universidade do Algarve.
Por último, Do passado no presente, que acolle os textos de Paula Godinho, profesora da Universidade Nova de Lisboa; J. Cadima Ribeiro, profesor da Uminho, e Pedro Azevedo, doutor da Universidade de Trás-os-Montes e Alto Douro.
No volume tamén participaron Antón García, lector na Universidade Nova de Lisboa; Claudia Mariño, lectora na Universidade do Algarve, e Raúl Costas, lector na Universidade do Minho.