O presidente da Xunta participou este mediodía no acto de entrega das Medallas do Parlamento de Galicia
Feijóo define ao Parlamento de Galicia como o templo das liberdades galegas e resalta o labor dos órganos de control
“Grazas á institución que dirixe a Valedora Dolores Fernández Galiño, e ao Consello do que é conselleiro maior José Antonio Redondo López, a cidadanía galega ten unha protección adicional”, salienta
Refírese ao Consello da Cultura Galega como un punto de encontro de épocas e mentalidades: “Reflicte que Galicia e a súa cultura son obra de todos, na que todos teñen participación e acomodo”
Recalca que a democracia debe amosar por si mesma que é o mellor sistema para blindar a liberdade e responder a todas as emerxencias, recordando que feitos como unha crise, unha pandemia e unha guerra poñen a proba a súa resiliencia
O presidente da Xunta, Alberto Núñez Feijóo, definiu hoxe ao Parlamento de Galicia como o “templo das liberdades galegas” e resaltou o labor dos órganos de control, sen os cales, dixo, xa non é posible concibir o exercicio do autogoberno.
“Grazas á institución que dirixe a Valedora Dolores Fernández Galiño, e ao Consello do que é conselleiro maior José Antonio Redondo López, a cidadanía galega ten unha protección adicional”, aseverou, subliñando que distinguilos coas Medallas do Parlamento de Galicia non é máis que facer oficial un recoñecemento do que xa gozan por parte do pobo galego.
Por outra banda, e en canto ao Consello da Cultura Galega, afirmou que a Cámara outórgalle a súa máxima distinción ao que é, en suma, un punto de encontro de épocas e mentalidades. “Reflicte que Galicia e a súa cultura son obra de todos, na que todos teñen participación e acomodo. Somos, en efecto, unha cultura viva que avanza e descubre novos horizontes, na que poden convivir avós e netos, sen que ningunha xeración se sinta estraña”, abundou.
Ao longo da súa intervención, o presidente da Administración autonómica resaltou o amor á liberdade característico dos galegos, “sen o cal esta Cámara sería un mero monumento baleiro”, afirmou, incidindo en que os debates que se producen no Parlamento son a transposición de moitos outros que os galegos celebran ao longo da súa vida.
Feijóo concluíu resaltando que, malia algunhas aparencias, a democracia non é un sistema de goberno feble nin disfuncional, senón que responde aos anhelos máis fondos da dignidade humana e posúe a capacidade de emendar erros, de corrixir camiños equivocados e de inculcar naqueles que teñen un mandato democrático a idea de que as súas facultades son sempre delegadas e transitorias.
Non obstante, recalcou que a democracia non pode xustificarse só por oposición a aqueles que perseguen a súa liquidación: “Debe amosar por si mesma que é o mellor sistema para blindar a liberdade e responder a todas as emerxencias”, dixo, recordando que feitos como unha crise, unha pandemia e unha guerra poñen a proba a súa resiliencia.
A carón de Ucraína
O presidente da Xunta aproveitou o acto de entrega das medallas do Parlamento para, facéndose eco da solidariedade da que fai gala o pobo galego e español, expresar que Galicia síntese a carón de Ucraína.
“España e Ucraína pertencemos á mesma familia das democracias, e o que alí sucede non pode resultarnos alleo. Nin podemos ser equidistantes fronte a unha invasión que está derivando en crimes de lesa humanidade, nin practicar un falso pacifismo que lle negue ao pobo ucraíno todo tipo de axuda para defenderse lexitimamente”, sentenciou.