O Sergas publica a relación de admitidos e excluídos e a baremación da actualización das listas de selección temporal de diversas categorías de persoal estatutario
O número total de admitidos é de 3.191
Só resultan excluídas do proceso o 1,6% das solicitudes de participación
A categoría con maior número de solicitudes é a de médico de familia, con 1.144 inscricións
Santiago de Compostela, 5 de abril de 2022.- O Diario Oficial de Galicia publica, na súa edición de hoxe, o anuncio polo que se dá publicidade á relación definitiva de admitidos e excluídos e ós resultados definitivos de baremación no proceso de actualización das listas de selección temporal de diversas categorías de persoal estatutario do Sistema público de saúde de Galicia: enfermeiro especialista en enfermaría de saúde mental, enfermeiro especialista en enfermaría do traballo, enfermeiro especialista en enfermaría familiar e comunitaria, enfermeiro especialista en enfermaría obstétrico-xinecolóxica (matrón/a), enfermeiro especialista en enfermaría pediátrica, médico de familia, médico de urxencias hospitalarias, médico coordinador do 061, médico asistencial do 061 e pediatra de atención primaria.
O número total de admitidos é de 3.191. Só resultan excluídas do proceso o 1,6% das solicitudes de participación. A categoría con maior número de solicitudes é a de médico de familia, con 1.144 inscricións. O 19,13% foron novas inscricións realizadas despois da data límite de presentación do anterior proceso.
As listas definitivas de admitidos e excluídos, atópanse publicadas na web do Servizo Galego de Saúde (www.sergas.es) no apartado Emprego Público-Listaxes de contratación de persoal estatutario. Os aspirantes poden consultar desde hoxe, no seu expediente electrónico persoal (Fides/expedient-e) a súa posición e o número de orde nas listas xeradas; así como de ser o caso, as causas de rexeitamento dalgún dos méritos presentados, dotando de total transparencia ao proceso de selección.
As novas listas entrarán en vigor a efectos de chamamentos o día 6 de abril de 2022.
Próximas publicacións
Proximamente publicaranse as listas provisionais de admitidos e excluídos e a baremación provisional das seguintes categorías: facultativo especialista de área de psicoloxía clínica, farmacéutico de atención primaria, fisioterapeuta, logopeda, médico especialista en medicina do traballo, odontólogo de atención primaria, terapeuta ocupacional e traballador social.