A Xunta realiza sondeos xeotécnicos na LU-651 en Folgoso do Courel para definir as obras necesarias para restituír a vía tras o desprendemento rexistrado
O obxectivo destes traballos, que tamén inclúen o levantamento topográfico con drons, é coñecer o comportamento do terreo para avaliar a viabilidade das distintas alternativas para restablecer a conexión viaria
A Xunta agarda que nas vindeiras semanas se poida determinar a alternativa elixida e un calendario de realización das obras para avanzar de xeito áxil na súa execución
A Xunta está a realizar unha campaña de sondeos xeotécnicos na zona do afundimento da estrada LU-651, na súa chegada a Folgoso de Courel, para definir as obras necesarias para restituír a vía.
O obxectivo destes traballos é coñecer e profundidade o estado e o comportamento do terreo co fin de poder avaliar a viabilidade das distintas alternativas para o restablecemento da conexión viaria.
No marco destas intervencións, tamén se realizou estes días un levantamento topográfico coa axuda e a utilización de drons.
Unha vez obtida esta información, a Xunta agarda que nas vindeiras semanas se poida determinar a alternativa elixida e un calendario de realización das obras, sendo a seguridade e a axilidade na execución dos traballos os factores máis importantes que se deben considerar.
Esta vía de acceso ao Courel desde Quiroga permanece cortada ao tráfico como consecuencia do desprendemento rexistrado á altura do quilómetro 18 da estrada LU-651, entre Santa Eufemia e Folgoso, o pasado 20 de marzo.
Tal como se comprometeu a conselleira de Infraestruturas e Mobilidade, Ethel Vázquez, na súa recente visita á zona, a Xunta está a traballar desde o primeiro momento, analizando as alternativas posibles para restablecer, canto antes, a comunicación viaria entre Quiroga e Folgoso.
Imaxes relacionadas
