O servizo de prevención de incendios forestais da Xunta comparte cos seus homólogos de Paraguai a súa experiencia na execución de queimas prescritas

Técnicos forestais do Servizo de prevención de incendios forestais da Xunta formaron de xeito telemático aos seus homólogos de Paraguai no manexo das queimas prescritas e no réxime galego de comunicacións e autorizacións de queimas de restos agrícolas e forestais.

Solicitada desde a Organización das Nacións Unidas para a Alimentación e a Agricultura (FAO), a instrución levouse a cabo en colaboración co Ministerio para la Transición Ecológica y el Reto Demográfico. En concreto foi dirixida ao Instituto Forestal Nacional (Infona) de Paraguai, onde se acaba de aprobar unha lei sobre o manexo integral do lume que traslada aos municipios a competencia para autorizar, supervisar e facer seguimento ás solicitudes de queimas, principalmente de pastos para gando. No ámbito nacional quedan as facultades de sancionar, fiscalizar e tamén levar a cabo seguimento e coordinación.

Nesa liña, o país suramericano atópase agora preparando as regulacións pertinentes para aplicar a nova lei, para o que solicitou información sobre a experiencia en España. Así, dende a Consellería do Medio Rural debullouse o modelo actualmente en vigor en canto ás comunicacións de queimas de restos agrícolas e ás autorizacións de queimas de restos forestais. Tamén sobre o uso do lume por parte do Servizo mediante queimas prescritas, que se executan sempre con criterios técnicos co fin de anticiparse aos incendios forestais.