A Xunta recibe 10 ofertas para executar as obras para dotar de saneamento os núcleos de Viladónega, o Outeiro e o Pedral, en Boimorto, que suporán un investimento de 487.000 €
Construirase unha rede de colectores e unha depuradora para o tratamento das augas residuais deste 3 lugares do municipio, con vivendas unifamiliares dispersas, ademais dunha pequena explotación gandeira e un bar
As obras iniciaranse a finais de verán e dispoñen dun prazo de execución de 4 meses, co obxectivo de que estean rematadas a comezos de 2023
A Consellería de Infraestruturas e Mobilidade, a través de Augas de Galicia, recibiu 10 ofertas de empresas para executar as obras para dotar de saneamento os núcleos de Viladónega, O Outeiro e O Pedral, no concello de Boimorto, que suporán un investimento de 487.000 €.
As actuación enmárcanse no convenio asinado entre a Xunta e o Concello polo que a Administración autonómica cofinanciará a actuación nun 80%, comprometéndose a entidade local a realizar os trámites e a poñer á disposición os terreos, ademais de cofinanciar o 20% das actuacións.
As obras son susceptibles de contar con financiamento europeo do eixe REACT-EU do programa operativo FEDER Galicia 2014-2020, como parte da resposta da UE á pandemia da covid-19.
Os traballos prevén iniciarse a finais de verán e dispoñen dun prazo de execución de 4 meses. O obxectivo é que estean rematados a comezos de 2023.