A Xunta incrementa os premios extraordinarios de Formación Profesional de grao superior
Estes galardóns teñen como obxectivo recoñecer o esforzo e o bo aproveitamento académico do alumnado que cursa estes estudos
Cada premiado recibirá 1.000€, cun incremento de 150€ por persoa con respecto á convocatoria do ano pasado
O prazo para presentación de solicitudes estará aberto ata o día 21 deste mes
A Xunta de Galicia vén de convocar os premios extraordinarios de Formación Profesional de Grao Superior correspondentes ao curso 2020/2021 para o alumnado que rematou os seus estudos no ano 2021.
A Consellería de Cultura, Educación e Universidade convoca ata 23 premios extraordinarios, un por cada familia de Formación Profesional de grao superior implantada en Galicia. Poderán optar a estes premios os estudantes que obtiveran unha cualificación final do ciclo formativo igual ou superior a 8,5 puntos, entre outros requirimentos.
O prazo de presentación de solicitudes para optar aos galardóns estará aberto ata o día 21 de abril. As solicitudes presentaranse obrigatoriamente por medios electrónicos a través da sede electrónica da Xunta de Galicia, ou directamente desde a propia aplicación PremiosEdu.
O obxectivo destes galardóns é recoñecer publicamente os méritos excepcionais baseados no esforzo e no traballo do alumnado que cursou cun excelente resultado académico estudos de Formación Profesional de grao superior en Galicia e enmárcanse dentro das diferentes accións que leva a cabo a Xunta para a posta en valor e fomento da excelencia dentro do sistema educativo galego.
A dotación orzamentaria para estes premios é de 23.000 euros que se distribuirán entre os galardoados na mesma contía, de 1.000 € por alumno (150 euros máis ca na anterior convocatoria). Ademais da correspondente dotación económica, a obtención destes premios dálle dereito ao alumnado a concorrer, logo de inscrición, ao correspondente premio nacional de formación profesional de grao superior
Imaxes relacionadas
