Os estudos indican que formaron parte dun complexo de edificacións dedicadas a curtiduría, con elementos orixinais romanos e outros datados no século XVI
A Xunta licita en 72.300 euros a posta en valor da cloaca e a piscina atopados no cubo VI da Muralla
O delegado territorial de Lugo, Javier Arias, sinala que as empresas interesadas teñen de prazo ata o día 19 de abril para presentar as súas ofertas
A Consellería de Cultura, Educación e Universidade vén de licitar as obras de posta en valor da cloaca e outros elementos arqueolóxicos situados na contorna do cubo VI da Muralla de Lugo, ás que destina un orzamento de 72.300 euros.
As estruturas máis visibles son o pasadizo ou galería de forma rectangular que discorre perpendicular ao adarve atravesando o lenzo, e unha balsa rectangular ou piscina construída en paralelo ao monumento e unida a este por dous muros laterais, un deles con acceso de escaleiras.
A hipótese máis probable é que formaran parte dunhas instalacións máis amplas dedicadas á produción de curtidos. A análise dos morteiros determinou que hai elementos orixinais romanos e outros que pertencen ao segundo cuarto do século XVI. No proceso de escavación atopáronse entre os cascallos restos de coiros, cortizas de madeira e revestimento de alcatrán.
O delegado territorial da Xunta en Lugo, Javier Arias, lembrou que o túnel foi atopado durante as obras de rehabilitación do Cubo VI no ano 2016, e “traballouse dende entón ampliando as escavacións arqueolóxicas e estudando o achado con miras a esta musealización”. Tamén foi preciso recabar a colaboración do concello para modificar a rede de saneamento e liberar o acceso á embocadura do pasadizo.
Nesta nova fase vaise proceder á escavación dunha gabia en paralelo ao muro que acomete á Muralla ao norte da piscina e chega hasta os setos, e á escavación da parte superior do muro que flanquea a escaleira para determinar a configuración da mesma.
No que respecta ás actuacións para a posta en valor, para a galería interior colocaranse luminarias idénticas ás do peto do adarve e colocadas á mesma altura, e para iluminar a piscina utilizaranse as mesma luminarias que se colocaron como bañadores de parede nas escaleiras orixinais.
Haberá escaleiras para o acceso ás partes inferiores da piscina, e a galería poderá verse a través dun acristalamento con vidro laminar. Como medida de protección procederase a colocar unha varanda e completarase a exposición dos restos cun panel de aceiro inoxidable integrado na varanda.
Javier Arias sinalou que as empresas interesadas en executar esta actuación teñen de prazo ata o día 19 de abril para presentar as súas ofertas.
Imaxes relacionadas
