A Xunta remata as obras de mellora do abastecemento en varios núcleos do concello de Lobios, tras un investimento de 290.000 euros

A Consellería de Infraestruturas e Mobilidade, a través de Augas de Galicia, rematou as obras de mellora da rede de abastecemento en varios núcleos do concello de Lobios, tras un investimento de 290.000 euros.

A titularidade das novas infraestruturas hidráulicas foron entregadas hoxe ao Concello.

A intervención da entidade hidráulica da Xunta incidiu na resolución das carencias na rede de abastecemento municipal nos núcleos de Vilameá, A Devesa, San Paio e Esperanzo co fin de optimizar a calidade de subministro á poboación.

As actuacións executadas por Augas de Galicia distribuíronse en dúas zonas: unha en Vilameá e A Devesa, e a outra en San Paio e Esperanzo. As intervencións centráronse na actualización do sistema de distribución, solucionando os problemas de roturas na rede por mor do exceso de presión.

A intervención na contorna de Vilameá e A Devesa consistiu na execución dunha rede de distribución desde o depósito actual ata os dous núcleos. Executouse un anel principal en tubaxe de polietileno soldable dunha lonxitude de preto de 1 quilómetro. Desde o anel instaláronse tubaxes que distribúen o caudal necesario aos dous núcleos.

En canto aos traballos en San Paio e Esperanzo, acometéronse redes independentes para estes dous núcleos de poboación. A nova rede parte do depósito xa existente e ten unha lonxitude de máis de 1.71 quilómetros e desde o anel principal, e para distribuír caudal aos dous núcleos, instaláronse uns 973 metros de tubaxes.

A Xunta, a través destas actuacións, continúa prestando apoio técnico e financeiro aos concellos para que poidan exercer as súas responsabilidades de saneamento e abastecemento dun xeito eficiente.

As actuacións contaron co cofinanciamento da Unión Europea, a través do Fondo Europeo Agrícola de Desenvolvemento Rural (FEADER), no marco do Programa de Desenvolvemento Rural (PDR) Galicia 2014-2020.