Galicia participa na creación dun indicador que permita localizar zonas territoriais en risco demográfico en España

A Xunta de Galicia participa, co resto de Comunidades Autónomas e co Ministerio para la Transición Ecológica y Reto Demográfico, na elaboración dun indicador estatístico que permita localizar as zonas territoriais en risco demográfico no conxunto de España.

O Indicador Multidimensional de Situación y Sinopsis Territorial (Insiste) estase a realizar a través dun grupo de traballo específico no que Galicia vén participando de forma activa, con técnicos da Consellería de Política Social e coa colaboración do Instituto Galego de Estatística.

Neste sentido, o director xeral de Familia, Infancia e Dinamización Demográfica, Jacobo Rey, participou hoxe na Comisión Sectorial de Reto Demográfico, que se celebrou en Madrid e onde se analizou a situación desta ferramenta.

Realidade galega

Deste xeito, Jacobo Rey defendeu que nesta nova ferramenta se teña en conta a nivel municipal cuestións como a variación da poboación, a idade media ou a taxa de dependencia, para que se reflictan de xeito adecuado a realidade territorial e demográfica da comunidade galega, que se caracteriza polo avellentamento da súa poboación e a dispersión poboacional.

Así mesmo, agradeceu o esforzo de todos os integrantes da comisión neste traballo e apostou por acadar nos vindeiros meses “un indicador que satisfaga a todas as comunidades autónomas, pero que obviamente dea resposta aos principais problemas no eido demográfico, como son o descenso da poboación ou o seu progresivo avellentamento”, sinalou.