O servizo madrileño de saúde, interesado en aplicar o modelo de plataforma loxística do Sergas na súa comunidade
Representantes do Servizo Galego de Saúde, coa directora xeral de Recursos Económicos María Jesús Piñeiro, e da Xerencia de Atención Primaria da Comunidade de Madrid, visitaron esta mañá a Plataforma Loxística do Sergas, emprazada no concello de Negreira. A visita foi solicitada polo departamento sanitario madrileño, que está a traballar nun proxecto de plataforma loxística rexional, para coñecer de primeira man o modelo galego, ao que cualificaron de moi avanzado e con excelentes referencias dos seus provedores
Dende o ano 2013, a plataforma funciona como almacén único do Sergas de produtos sanitarios e non sanitarios, onde se fan as operacións loxísticas de recepción dos artigos das empresas provedoras e se preparan os pedidos de material. Ten 178 traballadores e contou cun investimento de 14,3 millóns de euros para a súa posta en marcha e a incorporación de melloras ao longo destes anos. O servizo loxístico está dispoñible os 365 días do ano, as 24 horas. Ademais, a plataforma goza dun alto nivel de produtividade, grazas a unha conxunción de factores. Entre eles, un deseño adaptado ás necesidades loxísticas, unha intensa automatización dos procesos, un uso masivo de tecnoloxías da información e un persoal especializado.