Galicia participa na conferencia sobre o papel das rexións europeas para achegar a medicina personalizada á cidadanía

O conselleiro de Sanidade, Julio García Comesaña, vén de intervir na conferencia celebrada en Bruxelas baixo o título “Achegar a medicina personalizada aos cidadáns: o papel das rexións europeas”, organizada polos socios do proxecto Regions4PerMed, do que a Axencia Galega de Coñecemento en Saúde é socio.
O evento iniciouse coa benvida por parte da Fundación de Investigación Biomédica da Rexión de Lombardía organizador da conferencia na súa sede institucional en Bruxelas, dando paso ás intervencións das autoridades rexionais en sanidade de Baixa Saxonia (Alemaña) e Galicia.
Durante a súa intervención por videoconferencia, o titular da carteira sanitaria do Goberno galego describiu a ampla experiencia do Servizo Galego de Saúde en medicina personalizada, destacando a historia clínica electrónica única do Sergas xunto co sistema de receitas; a Fundación Pública Galega de Medicina Xenómica como un dos centros de referencia do programa IMPaCT, coordinado polo doutor Carracedo; a creación dun centro de produción de terapias avanzadas (CAR-T); ou o papel de Galicia como rexión pioneira na compra pública de innovación a través de proxectos como Código 100 ou Innova MicroLab.
Tamén participaron no evento diversos membros das principais institucións europeas, en particular, do Parlamento Europeo e da Comisión Europea, e contou con representantes do Consorcio Internacional de Medicina Personalizada (ICPerMed) e o da Rede Europea de Pacientes de Melanoma, coa finalidade de mostrar o gran potencial que ten a Medicina Personalizada e aumentar o compromiso das autoridades tanto europeas como rexionais na súa implantación nos sistemas sanitarios para beneficio da poboación.
Regions4PerMed
Este proxecto ten como misión coordinar as políticas rexionais e programas de innovación en medicina e asistencia sanitaria personalizadas para promover e acelerar o uso da medicina e asistencia personalizada nos pacientes. Ten un orzamento de 1,7 millóns de euros e conta con seis socios europeos, a Axencia Galega de Coñecemento en Saúde en Galicia, a Fondazione Regionale per a Ricerca Biomédica en Lombardia e a Fondazione Toscana Life Sciences en Toscana, ambas en Italia, o Sachsisches Staatsministerium fur Wissenschaft und Kunst en Sajonia de Alemaña, e a Urzad Marszalkowski Wojewodztwa Dolnoslaskiego e a Uniwersytet Medyczny Im Piastow Slaskich We Wroclawiu, ambas en Baixa Silesia en Polonia.