A folga do transporte reduce até nun 50% a entrega de material sanitario na Plataforma Loxística do Sergas

A folga do Transporte iniciada o pasado luns, día 14 de marzo, está a ter unha repercusión importante na entrega de pedidos de material na Plataforma Loxística Sanitaria de Galicia. Así, o paro do sector loxístico está a provocar unha redución de entre o 40 e o 50% nas entregas de material sanitario, respecto aos días de actividade normal.
Por este motivo, a Subdirección Xeral de Compras e Servizos Xerais do Servizo Galego de Saúde está a adoptar diferentes medidas, co obxectivo de minimizar ao máximo o impacto da folga no subministro de material aos centros sanitarios.
Entre as decisións acordadas, o Servizo Galego de Saúde está a contactar cos provedores máis importantes que non están a realizar entregas na Plataforma estes días, para acordar posibles solucións no que atinxe ao transporte.
Así mesmo, o departamento sanitario da Xunta facilitou acreditacións ás empresas con cargas completas e habituais para o Sergas, nas que se advirte dun xeito específico que transportan material sanitario para a Plataforma Loxística da sanidade galega.
Do mesmo xeito, acordou flexibilizar o horario de entregas e a recepción do material na Plataforma loxística de Negreira, unha actividade que se podería levar a cabo mesmo en horario nocturno.
Ademais, o Servizo Galego de Saúde tamén identificou os artigos almacenables con existencias por baixo do seu stock de seguridade, na procura de buscar alternativas, no caso de ser preciso.